張敬軒獲Tyson Yoshi送贈001序號的限量版黑膠。
Tyson Yoshi昨晚(6日)於啟德體藝館舉行尾場《THE VILLAIN LIVE IN HONG KONG 》演唱會，Tyson請來亦師亦友的張敬軒擔任嘉賓，送上序號「001」的限量版黑膠予軒公，感激軒公在他迷失時指定迷津，軒公自言幫Tyson「出火」，果真突破盲腸。獲厚愛的軒公亦宣布為Tyson「破處」玩「插水」，處男「下海」一次還未夠喉，更是一破再破，以實際行動「雙倍奉還」。
有今生冇來世
當Tyson唱《By My Side》時，張敬軒現身合唱，Tyson跪地迎接，軒公見狀立即跪下，兩人站起身擁抱，兩人在觀眾大合唱下唱畢歌曲。Tyson高呼：「大佬軒」，未待軒公開口已表示要送上禮物，軒公見Tyson拿著巨型黑盒，驚問：「fans燈牌？」Tyson秒回：「最憎燈牌！」原來是限量版全球只有666隻的「Numbered 3rd 666 Rocket Deluxe Vinyl」黑膠，序號「001」即是第一隻，Tyson自言第666隻留給自己，軒公戴上手套小心翼翼地開封，「真係有今生冇來世！要擺喺床頭，Tyson嘅idea好好，我覺得係我睇過嘅演唱會，最有taste！」Tyson笑言：「真係識啲嘢。」轉過頭，軒公又說笑指黑膠設計似呔鈴，叫Tyson送上4隻。
張敬軒功用如涼茶 幫Tyson「出火」
接著，Tyson認真表示在盒上寫了一些話，叫軒公記得細讀盒上字句，軒公聞言即問道：「你怕肉麻咩？我而家讀出嚟。」原來寫著，「Thanks for everything, thanks for guiding me the right path when I lost, love you My big brother ！」 Tyson解釋，「當我有啲嘢嚟唔通，尤其呢一行，好想發脾氣，就會發癲打俾佢，然後通常就會撳番低怒火。」豈料軒公搶白問道：「所以我嘅功用係涼茶，負責『出火』……係『下火』。」全場爆笑。
Tyson擔心賠唔起
走得上Tyson演唱會的啟德舞台，玩插水是指定動作，張敬軒笑言，「我由入行已經行好Classic同elegant路線，為咗Tyson Yoshi，我今晚喺啟德『破處』！」他笑言可收埋的都已收埋，「咁大個仔都冇試過咁多隻手喺我自己身上。」不過似乎人群未能將軒公移動，很快他就返上台，「男人大忌，快呢家嘢！」Tyson笑問：「係咪想試多次？」軒公沒有拒絕，Tyson卻有點擔心，罕有地猶豫不決，「放過老人家，如果有咩差池，佢公司我真係賠唔起！」最終，軒公在全場起哄下再度插水，作為首位同場兩度插水的嘉賓，他笑言，「嗰邉有人揸我囉柚，呢邊有人拍我肚腩，好開心！」場面溫馨又爆笑。
ADVERTISEMENT
20周年「全城撐本地消費3重大激賞」！ 即睇活動詳情！
