近年多咗唔少內地演出機會嘅容祖兒，早前喺綜藝真人show《牧野家族》入面食豬糧，仲話味道似自己食嘅早餐麥皮，成為香港網友討論話題。
祖兒嘅公司回覆傳媒，解釋食豬糧嘅原因，原來係拍攝節目過程當中，祖兒要照顧一隻豬同一隻兔仔嘅起居飲食。而祖兒就親自下廚煮南瓜湯俾豬仔食，餵之前仲試埋味，希望豬仔食得開心。
祖兒仲話好難得可以過牧場生活，學到好多生活知識，好掛住朝夕相對多日嘅豬仔同兔仔添。
睇返節目片段，祖兒查完資料知道南瓜對豬有益，於是喺一袋「水麵粉」入面，拎出豬飼料煮南瓜湯餵豬仔食，自己亦食埋一份。之後祖兒以為飼料只係麵粉，但係畫外音提醒包裝袋嘅資料唔等於內容，祖兒先知真係食咗飼料，但係似乎佢都冇咩所謂。
