五索指馬清鏗是「絕世好爸」和超級直男。
「五索」鍾睿心(Rachel)與大生銀行主席馬清鏗拍拖9年並育有4名子女，近年二人愈愛愈高調，五索除多次在短片不避嫌公開與馬生的甜蜜生活，適逢昨日父親節，她更上載馬生的絕密湊仔點滴，並公開表揚他是一位「絕世好爸」。
馬清鏗餵奶、換片、氹瞓覺 親力親為
片中，五索稱馬生絕對是一個「超級直男」，「日日奪命追魂call，我好多時候俾佢激到反晒白眼，唯獨有一樣嘢，我係特別感激佢，就係佢係一個一等一嘅好爸爸。」她續大數馬生的好爸爸行為，「咁多年來，佢係冇發過小朋友1秒鐘脾氣，由餵奶、換片、氹佢哋瞓覺，佢都係親自落手落腳，我都好surprise佢係一個咁好嘅爸爸 ，所以好多謝你咁照顧佢哋，馬先生父親節快樂。以後你對啲小朋友咁好時，都要對我咁好。」片中見馬生除親自下廚，又陪小朋友騎膊馬、玩舞獅、氹瞓覺、餵奶，更戴上孭帶親身孭住BB ，十足「廿四孝」老竇。
倒瀉奶 嬲咗七年
片段尾聲，五索爆因一事嬲足馬生七年，並要求對方道歉：「你仲爭我一句道歉，呢件事我足足嬲咗七年，七年前我好努力渣出嚟嗰啲奶，我渣咗兩個鐘，但係你一個唔覺意就倒瀉晒成支奶，仲同我講話因為你好攰，仲想點？咁其實你係應該同我道歉囉，因為你永遠都唔會明白，渣奶係幾咁辛苦嘅一件事。」