2025-08-15 17:00:00

伍仲衡控訴黑雨下陪太太覆診摸門釘　惹網民熱烈討論：冇常識

香港天文台於昨日（14日）早上7時50分發出黑色暴雨警告信號，部分地區出現大暴雨及水浸情況，直至11時10分改發紅色暴雨警告信號，取代黑雨警告。著名音樂人伍仲衡於中午時分喺社交平台發文，分享黑雨期間陪太太覆診嘅過程，控訴去到診所先發現冇開，到中午約12時診所亦未有回覆佢嘅查詢。帖文引發網民熱烈討論，各持不同意見。

網民：冇人返工梗係冇人聽啦！

伍仲衡於社交平台發文表示太太原定今日覆診，但未能聯繫診所，結果摸門釘，寫道：「伍太約咗今日11:45am覆診，由於黑雨，今朝打電話去診所問吓開唔開，但係打咗5次都冇人聽，WhatsApp問又冇回覆…….由於約好咗，我哋就照去，滂沱大雨揸車由屯門出尖沙咀，結果去到診所……冇開！而家喺附近食緊午餐，診所都仲未有回覆」

有網民就認為伍仲衡冇常識，指黑雨下診所又點會開：「今朝7點50都已經掛黑雨，政府所有診所專科日間治療中心都唔開，更何況私家？其實打左成朝都無人聽真係好正常囉」，對於伍仲衡表示診所冇人回覆佢，唔少網民都認為係正常，指冇人返工又點通知佢：「冇人返工梗係冇人聽啦！冇人返工咁公司WhatsApp梗係冇人覆啦！」、「常識題：黑雨唔使返工，診所點會有人聽電話呢？」、「無人聽電話同覆WhatsApp咪即係唔開囉」、「好正常。應該係下午先開工既」等等。

不過都有網民覺得伍仲衡只係陳述件事出黎，又指可能佢太太真係好有需要睇醫生，表示都真係有啲診所喺黑雨下係會開：「咁可能人哋好急要去覆診呢，其實有乜好公審啫？你又唔知人哋咩病」、「但你哋有冇諗過佢睇咩科先你地做咩鬧佢，可能佢真係好有需要，未睇醫生咪會講得出呢啲嘢」。

原文刊登於 Yahoo 娛樂圈