2025-08-14 19:00:00

前TVB御用古惑仔劉文俊由臨記變老闆　嫌電視台多掣肘15年前轉型

有睇八九十年代TVB劇，一定會認得經常演飛仔、古惑仔嘅「御用惡人」劉文俊，當中喺《新紮師兄》飾演張曼玉妹妹男友「韋家輝」最為人記得。入行多年，劉文俊由臨時演員變成提供臨時演員嘅中介公司老闆，近年眼見影視製作息微而轉行，瓣數多多。

劉文俊提到自己十四、五歲就入行

前TVB藝人楊英偉喺個人youtube頻道訪問今年已經58歲嘅劉文俊，提到自己十四、五歲就入行，當時為家人經營嘅士多看鋪而結識喺TVB做保安嘅街坊，並著對方介紹佢入TVB拍戲，殊不知保安哥哥真係幫佢搭路，為黃日華主演嘅《香城浪子》做臨記，自此打開幕前之路，拍過《射鵰英雄傳》、《學警出更》等劇集。

劉文俊後來開設提供臨時演員嘅中介公司，事事親力親為，不時到現場指點臨演走位，甚至幫手處理幕後事情。落力之餘，劉文俊好撐臨時演員，最憎人叫臨演做「茄喱啡」，甚至試過因為有臨演要跳落個好多蟲嘅湖，於是同TVB要求借地方俾臨演沖身﹐但被保安拒絕，結果要搵當時係導演、而家成為演唱會製作人嘅丘亞葵幫手，「跳湖」嘅臨演先至有得沖身。此外，劉文俊曾經因為工資太低，帶埋成班手足去TVB抗議，結果同TVB決裂。

本來做臨演中介幾好搵，但劉文俊眼見TVB角色轉變，似係做製作多於一個平台，而電影更加因為串流盛行而走入寒冬，於是喺15年前開始轉行，搞節目製作、開補習社同小食檔。

原文刊登於 Yahoo 娛樂圈