李尚正
下星期舉行嘅香港電影金像獎頒獎禮，有線（HOY TV）主持李尚正憑喜劇《死屍死時四十四》獲提名最佳男配角。43歲嘅阿正入行20年，《死》片中演出被認為係全片最搶眼之外，佢同妹頭（盧頌恩）主持嘅《卧底旅行團》系列節目，都係近年觀眾喜愛之作，收視雖然都係個位數，但對於HOY TV嚟講已經係王牌，而且已經拍到第3季。
陪伴多年嘅愛犬早前先行一步
《卧底旅行團》團隊經常參與有伏味嘅旅程，因而拍出另一種旅遊體驗，但李尚正早前接受專訪時，大爆原來《卧底旅行團》每集製作預算得三五千蚊！阿正喺有線大樓內接受專訪，但係夠薑喺有線PR面前，批評公司資源不足甚至管理不善，好波！
獲得提名當然開心，但阿正鏡頭後有一大堆事情跟手。阿正拍拖多年嘅女友，但對方十幾年前罹患癌症，甚至被醫生判斷冇得醫，但女友仍然活到今天。相反，陪伴多年嘅愛犬早前先行一步，令阿正相當傷心。然後，佢又要面對炒燶美股、賣樓大屋搬細屋、阿媽做手術之類嘅生活煩惱，但到鏡頭前又要搞笑俾你睇……
高考3A成績考入港大建築系
阿正2000年以高考3A成績考入港大建築系，但因為學業壓力太大決定休學去南美旅行，回港後考入有線娛樂台，初入行甚至有機會拍住林海峰做節目。後來周星馳睇到節目邀請過檔，阿正轉工去咗幫周生做幕後，到拍《長江七號》時機會參演班主任一角。
李尚正為周星馳嘅《西遊記降魔篇》及《美人魚》參與製作，但因為周生叫佢做編劇而請辭，阿正冇幾耐之後仲遇上車禍休養多時，手停口停到要問屋企人借錢。2010年阿正得到有線監製邀請回巢做主持，《卧底旅行團》同《香港空間大改造》2個節目反應同收視好，令阿正被稱為「有線一哥」。
原文刊登於 Yahoo 娛樂圈
潮濕天氣或引起過敏及哮喘，預防霉菌方法（am730製圖）
