原子鏸走出喪母之痛，重現笑容。
去年因母親鄭佩佩離世而陷入人生最低谷的原子鏸，今日終於重拾心情展露笑容，連日來在IG分享練舞片段，原來她為音樂劇《My Bubble and Me》作準備。子鏸表示：「今次我係短暫返香港一星期，主要係換身份證同探爸爸，順道做一個音樂劇《My Bubble and Me》。音樂劇叫呢個名，因為細個時成日活喺自己世界，每次遇困難好似將自己收埋喺bubble入面。」
唔想囝囝入行
子鏸上次香港演出已是2021年的事，她在美國一直有參演舞台劇，「我一直冇放棄過演藝事業，亦唔會放棄。因為我好愛演出。今次揾唔到場地，所以比較小型式。希望明年喺香港搞個大型。」
另外，子鏸透露今次有老公同囝囝陪伴返港。「囝囝好有表演慾，佢參加好多課外活動，陶瓷、烹飪仲有功夫。不過我唔想佢入呢行，想佢做其他行業，因為演藝呢行好辛苦。」
