黃耀明出席香港同志影展，對於同性伴侶登記制度被否決感失望。（娛樂組攝)
第36屆香港同志影展昨日（12日）舉行開幕典禮，共有22部長片和37部短片，大會邀請多位海外導演、演員來港出席映後分享及座談會。同場還有黃耀明（明哥）、盧鎮業、梁雍婷、許嘉浩、黃夏蕙、蘇家樂、李駿碩導演、黃修平導演等等到場支持。
《從今以後》導演楊曜愷以影展行政總監身份致詞時，提到立法會否決「同性伴侶登記制度」議案，他指自己對否決是非常失望，稱這是very very outdated point of view，與此同時為何同志影展是如此重要，因為影展成為橋樑讓市民明白同志社群的掙扎，更有同理心明白其處境。
黃耀明接受訪問時被問到草案被否決的看法，他說：「睇番今日嘅香港，連咁最高法定機構（終院）要我哋做嘅一個同志框架都過唔到，令我覺得香港非常之唔國際化、非常之落後嘅感慨。香港猛咁話要做國際化城市，起幾靚嘅體育園、起幾靚嘅咩都會，但內心、或者嗰個mentality仲係一個小漁村咁，我覺得唔係幾見得人，幾失禮人。」
問到是否預料之中，明哥說：「唔好俾我哋估中囉！真係渣渣地囉嗰班人，仲喺度話自己唔係一個橡皮圖章。所有遞上去嘅嘢都通過，係呢條唔通過。我諗佢哋做成套戲，都係為咗話俾人聽，『我哋唔係橡皮圖章囉！』用否定同志框架，就話自己唔係橡皮圖章。」
明哥對同性伴侶登記草案被否決感到失望。（娛樂組攝）
明哥坦言平權之路一定要靠大家努力，他說：「我出嚟講嘢，我知道大家都會剪咗佢，香港已經係冇公民社會㗎喇，公民唔可以出嚟講嘢，唔可以出嚟遊行，同志遊行、『一點粉紅』都唔知舉唔舉行得到。所以同志電影節一定要嚟參加，我啱啱隻手傷咗，睇完醫生，都要嚟參加。同志被人哋看見嘅機會實在太少，小眾喺香港越嚟越無權利。有咁嘅活動，我一定要嚟參加。」
黃耀明透露將有新歌推出。（娛樂組攝）
問到明哥的近況，他以「平靜」去形容：「梗係平靜，因為都無咩嘢做！」他透露最近亦忙於做自己的新歌，將於中秋推出，同時為何韻詩新專輯做音樂監製，已踏入埋尾階段，「將所有時間奉獻晒俾佢，何韻詩新專輯會喺年底推出，大家可以拭目以待！我覺得阿詩好叻，全部歌自己寫晒！」
明哥表示其新歌靈感來自一位美籍越南裔年輕作家王鷗行的著作《此生，你我皆短暫燦爛》，並稱此書為他帶來很多靈感，他說：「呢個年青作者作為社會局外人、難民，亦係同志，佢嘅身份，呢本書喺世界獲到好多讚譽，呢本書俾到好多靈感我。」
