吳諾弘與莫凱謙齊拍片 不約而同指童星標籤成包袱曾遭欺凌
港隊劍擊運動員吳諾弘（Lawrence）於2021年與張家朗、張小倫及蔡俊彥參加東京奧運男子花劍團體賽事，喺拉傷大腿情況下為團體喺3局取下14分，出色表現被指係「劍擊新星」。吳諾弘其實係TVB童星出身，演出過《酒店風雲》、《老友狗狗》、《最美麗的第七天》等多套TVB劇集，直到中五轉做全職運動員就淡出娛樂圈，僅為TVB劇集《是咁的，法官閣下》黃智賢與關禮傑一場格劍戲份擔任劍擊指導。2021年，吳諾弘開創個人YouTube頻道分享生活，不過2023年就冇再Update新片；日前，吳諾弘再次上載新影片，分享初嘗跳舞班嘅體驗，又拍攝「童星重聚系列」，邀請到當年參加TVB綜藝節目《殘酷一叮》一夜爆紅嘅莫凱謙一齊拍片。
莫凱謙6歲憑翻唱《習慣失戀》一夜爆紅
莫凱謙當年以6歲之齡參加《殘酷一叮》，憑翻唱容祖兒《習慣失戀》一夜爆紅，之後成為童星，喺劇集《阿旺新傳》中飾阿旺童年版獲關注，大學畢業之後簽約做歌手，2017年推出個人第一首個音樂作品《跳》，現時創立音樂製作室，又推出全新單曲《當大廈停𨋢但你需要從地面一級級行上11樓時會聽的歌》。吳諾弘邀請莫凱謙擔住YouTube影片嘉賓，莫凱謙則帶對方到自己嘅音樂製作室參觀；影片開首，莫凱謙坦言其實雙方係唔認識，吳諾弘補充指曾經見過一次，但就有共同朋友：「我哋之前有見過一次嘅，2018年香港劍擊公開賽，就喺愉景新城打，當時我係參賽者，佢就係表演嘉賓。」
談到當年童星身分，吳諾弘和莫凱謙不約而同表示，童星呢個標籤成為包袱，曾受到攻擊，甚至喺學校遭欺凌，莫凱謙指：「之前喺《殘酷一叮》個迴響太大，我當時係覺得以後做咩都好，都要掛住童星呢個身分，努力做音樂，努力話畀人知我唔再係嗰個小朋友，其實我有成長，但大家都係記得當時嗰個我，有時都會感到挫敗。」
吳諾弘深同感受，表示：「我覺得童星呢個字有啲貶義意思，會覺得你係童星嘛。當我每次有運動成績嘅時候，啲人就會話我係童星，或者奧運前後啲人會討論我，都係因為我係童星！某啲討論區上有人會攻擊我，我未打，會話『呢個童星實死啦』，呢個身份會令我受到額外嘅攻擊，其實我明明乜都冇做過。」
不過，莫凱謙就覺得有童星嘅經歷先成就到現時嘅佢，吳諾弘則認為細細個就接觸到成人嘅世界，會快啲知道咩應該講，咩唔應該講，而縱然童星身份令佢有唔開心嘅事發生，但都有開心嘅事，莫凱謙在旁表示認同：「有機會都想再做童星，呢個經歷對我來說，係開心嘅。咁既然開心，Why not？」吳諾弘將影片上載至YouTube之後，莫凱謙又留言感謝吳諾弘邀請：「第一次認真坐低對談，童星可能真係一個世人眼中好壞參半嘅Label，但係的而且確係一個好獨特唔係人人有嘅體驗！多謝Lawrence。」
網民：可唔可以搵番小迪拍片？
唔少網民見到吳諾弘和莫凱謙合體拍片，都表示二人大個仔，除咗覺得佢兩個有啲似樣，更指佢哋都係有夢想嘅年青人：「長大了啊」、「久違童星相聚」、「佢兩個細個個時我常常混亂，以為係同一個人」、「2位有夢想的年青人！加油」、「2個JAM歌，有冇得諗? 你地2位有總尷尬係入面」、「同是童星，你們居然長大才認識，其實我覺得你們在各自領域已經做得很好了」等等，又有網民叫吳諾弘將來可以邀請更多童星拍片：「童星集合拍條片」、「你幾時訪問下Jacky 仔？」、「可唔可以搵番小迪拍片」等等。
原文刊登於 Yahoo 娛樂圈