2025-08-18 12:30:00

呂爵安演唱會｜Anson Lo做嘉賓「登神」深情對話見證Edan爆喊：你都有今日

MIRROR成員呂爵安(Edan)昨晚(17日)舉行第二場《EDAN LUI “e to E” LIVE 2025》演唱會，請來好兄弟盧瀚霆和「五膠」包括魏浚笙(Jeffrey)、黃正宜(阿正)、劉沛蘅(Hillary)和徐浩昌(肥腸)擔任嘉賓，「登神」合體深情對話，向來淚腺閉塞的Edan被爆去年數度爆喊，Anson Lo半說笑指：「你都有今日！」Edan感激好兄弟支持，視對方為一生好友，而Anson Lo完騷後在社交平台限時動態，分享兩人背影合照，寫道：「從前你照顧我多，現在請你放心去衝，把你的煩惱和重擔都放在我身上吧，要相信自己，你是值得的，My Best Friend for life。」

Anson Lo完騷後在IG Story表示，視Edan為一生best friend。(IG@ansonlht)

Edan繼續化身「祓教大師」二登講經，並邀得「五膠」穿上佛袍「六祓」現身講經大會，並尊稱黃正宜(阿正)是「祓教師祖」，指所有「祓經」皆由阿正構思，但Sister阿正立即澄清是兩人一齊度橋，而所有粗口諧音都出自Edan主意，不過對觀眾而言，最重要是好笑。上次五膠擔任Edan個唱嘉賓，獨欠了珈其同台，今次難得齊人，聯合補送大禮賀Edan，Edan竟然笑問：「係咪送『祓女』，阿正即驚嚇制止老友亂玩食字gag。到正姐即刻制止老Best亂食字呀！其後五膠像兩年前一樣，拿著寫有「我哋愛你」四個大字的T恤做禮物，阿正踢爆Edan完騷忘了帶走禮物，竟4件Tee仍「滯留」化妝間。上次缺席的珈其拿出寫上「X」的T恤加入，順序組成「我哋愛X你」，更可馬上走位換成不同組合。最後「六膠」在T裇上簽名，送給現場fans，接著合唱《膠戰》新歌《To膠ther》，預告《膠戰S4》再見。

「五膠」Jeffrey、阿正、Hillary和肥腸化身「五袚」，擔任Edan演唱會嘉賓。(讀者提供)

「五膠」齊人再次送上兩年前的禮物，各人拿著一件Tee組成「我哋愛X你」。(讀者提供)

「登神」許願做一世best friend

Edan邀得好兄弟Anson Lo做嘉賓，「登神」合唱港版《社內相親》主題曲《我與你的差距》後，展開深情對話。Edan直言很少機會跟Anson Lo同台，故特別珍惜機會，今次個唱自己主場邀對方做嘉賓，「過去呢一年，真係好想特別多謝你，發生好多事，你一直喺身邊陪住我支持我，我好感恩入MIRROR識到你，然後有好多合作，令我哋真係變成……老實講，問我best friend一定係你，因為我哋乜都會講，乜都會分享，好開心好感恩有你呢個朋友，多謝你。」

Anson Lo見證Edan成長

Anson Lo回應道：「好坦白講，呢一年我見證你最大轉變的一年，我諗我識你7、8年，今年你對住我show得最多軟弱的時候，唔開心嘅時候，我今年見你喊過幾次，呢樣嘢唔係我認識嘅你，我覺得今年係你好需要我喺側邊陪伴嘅一年，我覺得呢樣係調轉咗，我諗出道頭5年，通常係我喊得多，我唔開心得多，我會無端端call你，你搵你約你出嚟，而家就你都有今日喇！」說畢，兩人相擁大笑，Anson Lo續說：「feel到你好大壓力，經常處於50/50狀態，好想俾你想你係堅強過你自己諗，好多時你唔相信自己嘅時候，你覺得你好唔deserve大家嘅愛嘅時候，而家在座嘅人可以話俾你知，你值得大家愛戴。」

Edan形容大家將會是一生的好朋友，「你唔使再問我friend唔friend，相信我哋可一生做對方嘅best friend，所以想同你分享呢個舞台。」兩人互拍膊頭，繼而合唱《大叔的愛》主題曲《突如其來的心跳感覺》，唱畢兩人再次肉緊攬攬後，Anson Lo為觀眾送上《你都有今日》。