周吉佩的成長是很香港，木屋區長大，遷入公屋，追夢失敗再接再勵。(吳康琦攝)
周吉佩憑住《中年好聲音》再次踏上舞台成為歌手，除了出歌、開騷外，今年他亦推出與歌曲《第三人生》同名的自傳，分享他的追夢，讓大家了解他的過去，為何他會一直不怕失敗。吉吉坦言自己花了廿年時間學會跌倒，成就一晚的飛翔，而之後的路也不是輕鬆走過，更要苦心經營，非常珍惜。人生中，吉吉要多謝的人很多，而對這3個人特別感激，包括︰爸爸、黎瑞恩及太太黃彥欣。
周吉佩推出與歌曲《第三人生》同名的自傳。
獅子山下香港人精神
吉吉的成長史是非常香港，兒時住木屋區，衛生環境欠佳，但他當時並不覺得差，「屋企無廁所，要行出去街口先有，其實當時自己唔會覺得差，只會覺得呢個就係自己生活環境。依家嘅小朋友唔一定有機會經歷，而呢個環境生活，的確係令自己想法會堅強啲。」其後一場大火，令他一家搬至公屋，生活得以改善，這些的確是很多香港人的經歷。吉吉說︰「唔知係咪因為我哋細個嘅經歷，係會堅強啲。覺得我嗰個年代成長嘅同學、朋友都好有獅子山精神，大家都會努力拼搏，無論經歷幾多次失敗，都會繼續努力。依家我見到佢哋無論喺香港定係外國，都闖出一片天。」
吉吉花了廿年時間學跌倒，令他更堅強。(吳康琦攝)
夢想與現實
堅持與重生是吉吉自傳重要訊息。回想過去，他由商場演唱歌手，之後組樂隊加入樂壇，其後轉行投身傳媒行業，他曾有一段時間連100元也難提款出來，也掙扎過夢想與現實的問題。他坦言曾有一段時間不甘心要做打工仔，但後來發現只要放下包袱就可以讓自己走得更遠。
他非常感恩傳媒的工作，為他帶來穩定的收入，之後更令他可以重新組隊玩音樂。他說︰「要追夢同時都要搵食，做音樂要成本，我係好感謝呢份工作，令我實現更多音樂夢。夢想同現實係可以平衡，有時一門手藝有機會成為你終身職業，我哋永遠唔知自己終點喺邊度，最重要係自己熱誠夠唔夠。」
周吉佩父親鼓勵囝囝追夢，亦成為周吉佩的原動力。
太太最反對
吉吉一路走來，身邊都有不同人支持，問到最重要的3個人物，他二話不說答出爸爸、黎瑞恩及太太。爸爸鼓勵自己去追夢；黎瑞恩教會他很多東西，認識不同的人；至於太太，吉吉笑言是有點複雜情感。他說︰「有啲情況，我知太太並唔係好支持我，雖然佢會反對，我就會好似鬥氣咁，你唔支持我就繼續做！直至佢覺得呢個世界唔止我係咁，佢就釋懷，放手俾我去做。」
要令太太安心
問到開工作室教唱歌，是否為自己買保險，原來吉吉是為了令太太放心讓他去追夢，「我嘅成長令我覺得有咩就跟住個勢去啦，順住去。佢會擔憂，因為佢係好需要安全感，始終演藝工作好浮動，佢好怕我無收入，於是我就開工作室教唱歌。呢一樣其實我都係想向太太交代，等佢安心啲，令佢見到一個數字或一啲經濟條件。依家我哋由伴侶變成拍檔，佢又成為我個助手，全頭家都要靠佢，真係好多謝佢，太太喺我人生參與度好高。」
周吉佩很感激黎瑞恩一直提攜。
ADVERTISEMENT
第2輪消費賞開始！勁送iPhone / 水波爐 / 行李箱 / 電飯煲！
