周柏豪內地出席活動排場勁
周柏豪近年參與《披荆斬棘》第二季、《聲生不息》及《大灣仔的夜2》等綜藝節目成功打入內地市場，吸金力十足，除咗於3月被疑似地產經紀爆已經買咗樓用作投資，日前有內地新娘不惜落重本邀請周柏豪做婚禮歌手，據悉只係出場唱咗《我的宣言》及《最好不過》兩首歌曲，酬勞已達70萬人民幣酬勞。周柏豪近日除咗忙於舉行巡迴演唱會，亦不時穿州過省出席商演活動；近日獲邀到大連出席商場活動，從網民分享到社交平台嘅影片所見，周柏豪到場時排場十足，現場至少有6名身材高大嘅保安為佢開路。
博主：大灣區哥哥40歲
身穿西裝嘅周柏豪表現相當親民，甫到場就不斷揮手與群眾打招呼，仲同現場小朋友有講有笑及與貴賓和博主等合照。有博主事後喺社交平台分享，寫道：「逛街偶遇大灣區哥哥40歲，皮膚狀態太好了吧！」不過，就獲心水清嘅網民糾正：「38！周柏豪要氣死了！」結果，竟令周柏豪留意到，更加幽默留言：「生氣了！」，一班網民紛紛大讚周柏豪玩得及EQ高。
原文刊登於 Yahoo 娛樂圈
