宇宙天團ERROR於上月推出新歌《愛情值日生》，歌曲MV兩星期已達120萬點擊，成績理想。四人日前接受本報電話訪問，從新歌創作、改歌名、拍MV的爭風呷醋事，談到家居抗疫，各有料爆。新歌獲兩位樂壇創作猛人何秉舜(何丙)與黃偉文(Wyman)加持，193(郭嘉駿)表示，原來早在《全民造星II》總決賽時，何丙已睇中ERROR主動提出合作。隊長肥仔(梁業)則大爆新歌原來有個勁爆歌名《七旋斬》，阿Dee(何啟華)和保錡(吳保錡)就分享獲索爆人妻謝安琪主動又拖又攬的體驗。
ERROR新歌《愛情值日生》大玩MK情歌feel。
阿Dee在《愛情值日生》MV中與謝安琪拖手溜冰，令肥仔羨慕不已。
保錡自言是「娛樂圈淆底獸」，導演提出才獲Kay從後抱抱。
肥仔自言蝕底，無得與Kay拖手仔。
193在MV中演膽小毒男，只能與謝安琪保持距離。
學鏡仔搵Wyman
《愛情值日生》由何丙包辦曲編監，Wyman填詞，ERROR首次與兩位合作，一切從2019年《造星II》決賽說起，肥仔表示，「有次經理人阿濟跟我哋講，何丙好想跟我們四個一齊jam歌，問我哋有冇興趣，我哋話OK喎。」193補充說：「其實何秉在《全民造星II》決賽已跟阿濟提出，想跟我們一起合作。」四子齊表驚奇，等到去年中終落實合作，193表示收到demo經過幾個月的來回修改，約在去年底定案，至於為何找Wyman填詞，肥仔笑言：「我哋見MIRROR個個都搵Wyman，我哋又試吓搵Wyman，跟住就搵咗Wyman。」問到四子有否寫下千字文給Wyman？阿Dee笑言，「只有百幾字，純粹話俾佢知歌曲想走咩方向，好快Wyman就pitch咗條橋，本身首歌唔係叫《愛情值日生》，首歌本身叫《一二三四》。」肥仔半說笑搶白說，「仲有個名勁啲叫《七旋斬》！」如果屬實，未知保錡可會示範「七連鞭」拍MV？ERROR自言一直鋪路要推出屬於這年代的MK情歌，自命MK界代表的保錡形容，「全首歌都好貼切，一聽就毛管戙，好鍾意！」早前他更特地錄製自彈自唱的acoustic version送給歌迷。
收真跡歌詞勁感動
不時為ERROR團歌填詞的阿Dee認真表示，收到Wyman真跡歌詞非常感動，「首先這份詞是失傳多年的Wyman手稿，何丙都好開心，佢做音樂多年，已有一段時間冇收過手稿，這已經好懷舊好有紀念價值。」他最喜歡是「幾多隻船 仍共你一起」一段歌詞的鋪排，「星期一、星期二輪流邊個陪你，好能夠表達我們想表達的，暗裡一兩句已好有故事，整首歌的歌詞好有MV畫面，令MV的構思暢順好多。」從年初一收到歌詞、錄音、拍MV到歌曲上架，僅需18日，果然快靚正，肥仔得戚表示，「我哋ERROR出名都係快！」豈料，卻遭阿Dee和保錡夾攻，阿Dee澄清說：「只係肥仔快，我哋3個都係正常！」保錡續說：「你快，我哋慢工出細貨！」
拍MV爭風呷醋？ 保錡自認「淆底獸」
《愛情值日生》獲謝安琪和張繼聰夫婦檔上陣，早前阿Dee在接受電台訪問時已透露，他與肥仔在一次首映巧遇兩夫妻拍拖睇戲，兩人便單刀直入邀請，促成今次合作。由遠觀女神到親身接觸拍MV，四子各有感受，有人歡喜有人勁葡萄，肥仔率先表態嫌未夠喉，「我好羡慕Dee哥可以拖手，我沒有這機會，蝕咗，保錡被阿Kay攬住！」阿Dee沾沾自喜地辯說，「從來都不需要爭取過拖手，我記得是去到現埸試位，阿Kay是主動遞起隻手，示意我可以拖，佢知道畫面要呈現浪漫感，我男仔尷尬不敢主動接觸，佢就主動跟我講：『你可遞起我隻手。』導演話好sweet，否則我點敢碰佢，聰哥一拳可以打暈我！」保錡亦強調，「我冇爭取，導演叫攬，阿Kay又OK，我只係演好角色，我呢種『娛樂圈淆底獸』，唔敢做咩，只想做好份工！」
考慮推暗黑版《愛情值日生》
歌曲表明是寫一腳踏幾船的浪漫愛情，有404(ERROR粉絲暱稱)有感而發留言，「感覺呢首歌入面嘅娘娘好似係講緊廣大觀眾/廣告商。係觀眾/廣告商心入面可能Error並非主流/第一位/本命），但Error無介意自己唔係首選，佢哋仍然出盡八寶，努力比觀眾驚喜，搏大家一笑。」問ERROR是否也表達他們為觀眾提供娛樂的心態？193就回應指，每個人對同一首歌有不同解讀，「沒有特定寫給fans、愛人或家人，一首情歌最得意是按你的處境代入不同情況，一首歌可有一百種解讀方法，如果fans有這種解讀，我哋當然開心，呢首歌為鍾意我哋的人而寫，而鍾意我哋的人就係我哋fans。」歌曲反應理想，問四子可會推出延續版或其他版本？阿Dee直未暫未有計劃，但忽發奇想，「可考慮推出暗黑版的《愛情值日生》，甚至推出概念EP。」肥仔則搞笑指可推出《愛情植入生》，令眾人起哄，他澄清說，「植入，即係植入愛情晶片。」至於幾時開Show，他直言一向有計劃，「我哋一向都係來到就嚟，所有都係天掉下來。」
奉行瞓覺抗疫
最後問四子若做家居抗疫值日生，會輪流做甚麼？「瞓覺擔當」的隊長肥仔(梁業)搶先答：「我會負責喺屋企瞓！」日前在ViuTV節目《今日疫情》大嘆cafe新店開張受延誤的193(郭嘉駿)，與阿Dee(何啟華)和保錡(吳保錡)都異口同聲毋須值日齊齊瞓，保錡補充說：「你諗吓，抗疫留喺屋企，唔可以使錢，淨係瞓覺先可以食最少嘢、飲最少水、花最少錢。」在工作暫停的日子，瞓覺不失是消磨時間的選擇。
