康城影展︳張雨綺行紅地氈攝影師零反應 仲被職員催「行快啲」
康城影展開鑼，行紅地氈當然係焦點之一。要行得上呢條「星光大道」梗係有原因，除咗係參展電影嘅主要人物人外，時尚品牌大使、傳媒安排甚至「課金」都係方法。觀眾只會睇見明星對鏡頭揮手嘅相，但係由另一角度睇就知實情。
將飾物拋向攝影師無人要
有內地網媒喺康城紅地氈附近高處拍片，見到內地藝人張雨綺行紅地氈時，兩旁嘅傳媒攝影師都冇咩反應，鏡頭垂低晒。不過張雨綺好落力擺pose又揮手又剩，但就俾現場工作人員兩度催促。
後來佢仲將橙色嘅飾物拋向一排攝影師度，可能係想好似偶像拋禮物俾fans咁。不過接到嘅女攝影師似乎冇咩反應，將呢件橙色飾物交俾後面一位揸相機嘅亞裔男士，唔知佢係唔係張雨綺嘅隨行人員呢？
康城影展都有為紅地氈做網上直播，有網民留意到張雨綺喺官方直播畫面度冇近鏡，其他內地藝人如關曉彤等都係得一兩個shot，男星賈乃亮甚至冇鏡頭俾佢！反觀打出國際名堂嘅鞏俐，唔單止直播有介紹，現場仲有唔少攝影師爭住影，地位高下立見。
原文刊登於 Yahoo 娛樂圈
