張敬軒日前心情不佳去食河粉，卻遇上三名粉絲守候。
張敬軒向來甚有「大將之風」樂於提攜後輩，更有不少新一代歌手受過他的恩惠，網民都冠以「樂壇社工」這個美譽給他。不過，這位「樂壇社工」近日亦面對負面情緒，日前他激罕在於社交網「放負」。
軒仔表示：「身邊有人發生咗啲事，我今日嘅心情係好沉重，今晚喺工作過後Derek帶我兜咗一陣風，然後我坐低喺華南（軒仔常幫襯的粉麵店），諗住靜靜咁食碗河粉，亦係我今日嘅第一餐。我由行入舖頭嗰一刻開始，佢哋三個就細聲講大聲笑，應該係講緊終於喺度捉到我了，老闆娘話佢哋捕咗我好耐。」他續指自己當時的心情與三位粉絲形成強烈對比：「我對筷子喺度夾緊啲粉，如果我嘅注意力唔擺喺兜粉度，我諗我嘅眼淚就會流落嚟。而成間舖頭，都充斥住佢哋三個嘅笑聲。我嗰一刻嘅心情同佢哋嘅心情形成咗極度諷刺嘅對比，不過我知道我嘅難處佢哋唔需要知道。」
張敬指自己當時在粉麵店的心情，與粉絲形成強烈對比。
帖文一出後，不少網民都表示心痛，更紛紛勸粉絲們要節制，好讓偶像有私人空間：「做歌迷要有邊界感的，佢嘅私人時間就唔好打擾佢啦！」可能引起不少網民擔心，事後軒仔亦刪掉了帖文。而昨晚軒仔的心情似乎已經回復過來，向來對音質非常執着的他，開心宣布將會開唱歌workshop，軒仔寫道 ：「臨瞓之前同大家講聲，我開唱歌workshop喇，耐唔耐到會見到網上有啲鍾意唱歌嘅朋友仔會分析我唱歌嘅方法， 自問唔係一個聲底特別好嘅人， 所以枕住咁多年都會嘰嘰趷趷下自己，呢十年八載以嚟都終結到一啲嘅經驗同埋心得。」
軒仔續介紹：「講唔上教學，不過係想系統啲咁樣分享下作品、分析消化、到到錄音之前嘅聲樂準備、再去到現場表演之後嘅位置轉換、當中更加包括入耳式監聽嘅調試技巧以及舞台現場表演概念、演唱會技術執行等等。我將我自己寫低超過四百幾頁嘅練習筆記同舞台Notes變成四個大範疇嘅講座，我亦都會拆解我部分嘅作品嘅處理思路同埋演唱方法。9、10、11月開壇, 有興趣嘅朋友就留意遲啲嘅消息喇。」不少粉絲得知後都非常興奮，並洗版式留言追問報名詳情及方法，軒仔就回覆透露：「係對外、公開嘅，大家有興趣都歡迎嚟！」
張敬軒宣布開唱歌workshop。
ADVERTISEMENT
第3輪消費賞開始！勁送iPhone / 冷氣機 / BB車 / 空氣清新機！
