張曼玉香港現身貼地買聖誕禮物 大爆「喜歡裝飾聖誕樹」
影后張曼玉近年鮮有作品推出，但就同唔少藝人一樣積極開拓社交平台。張曼玉昨日在小紅書分享去商場買聖誕禮物片段，寫道「聖誕節又快到了！這是一個我特別喜歡的節日。除了有藉口狂吃幾頓大餐，也特別喜歡裝飾聖誕樹，掛上很多可愛的飾物，和用閃閃的彩燈包圍著它。過程中，聽著聖誕歌，感覺很浪漫呢」。
似現身太古城買禮物
片段所見，張曼玉疑似出現港島區太古城中心，購買的聖誕禮物種類繁多，包括兒童書籍同玩具、裝飾品、花紙等。Maggie亦到訪連鎖體育用品店，揀選今期流行的Pickleball匹克球球拍等裝備，被網民大讚「她好親民啊」。
影后行街一樣唔夠時間、一樣會攰，張曼玉shopping中途在快餐店飲杯奶茶稍作休息，行到咁上下對住鏡頭話剩返一份禮物未買，但係約咗人食飯要趕住離開，而且唔想再行多轉，於是急急腳掃貨。最後Maggie終於任務完成，登上的士離開前，不忘祝網民聖誕快樂。
片中張曼玉以淡妝同曲髮造型現身，狀態相當唔錯，有人話Maggie同Do姐鄭裕玲撞樣！向來張曼玉都係時尚指標，網民睇完片就立即search下Maggie件皮褸係咩牌子！
原文刊登於 Yahoo 娛樂圈
ADVERTISEMENT
