2025-08-15 20:00:00

張繼聰被網民揭私下真面目 : 抵你今時今日咁成功

唔少人都對藝人私生活及私下個性感好奇，好想知道藝人到底係同屏幕形象一樣定係人前人後兩個樣，過往都有唔少網民分享自己偶遇藝人嘅親身經歷，爆出其真面目。近日，有網民於社交平台分享偶遇藝人嘅情況，逐一點名描述當時情境，以及與該藝人嘅互動，包括郭富城、衛蘭、張繼聰、MIRROR成員Lokman（楊樂文）、韓馬利等等。其中，該網民大讚郭富城、Lokman及張繼聰為人友善。

唔少網民加入讚張繼聰

該網民分享，郭富城和Lokman均有點頭微笑或講bye-bye，又激讚張繼聰冇架子：「食飯見到張繼聰係隔離枱，淨係見到佢食沙律菜，對住侍應勁好禮貌，果陣佢都未入TVB，問佢要求合照果陣有求必應、我叫佢『張生』、佢答我『叫阿聰得啦』，咁謙厚，抵你今時今日咁成功。」

帖文引起一眾網民討論，亦引來張繼聰本人現身留言：「我真係好可憐，剩係有得食沙律菜，下次見到面，請我飲杯咖啡得唔得先？最多我請你睇我演唱會。」樓主則回應指：「嘩，唔好話一杯，飲一打都得啦，請你食埋雞扒同蛋白、會唔會仲幫到手。」唔少網民都加入讚張繼聰，分享自己都曾經撞過張繼聰，對方表現同樣好友善，表示都唔介意請張繼聰飲咖啡。

另外，又有網民出PO激讚張繼聰，認為佢一直努力不懈，無論唱歌、作曲定演戲都有一定實力，為人搞笑又愛屋企人：「張繼聰真係可以話係一個完美男人。」表示張繼聰起步時發展一般，但一直冇放棄搵機會，由配角做到男一再勇闖電影界：「咁多年嘅努力同堅持，絕對冇白費，今日嘅成就係實至名歸。」張繼聰亦有於帖文下留言感謝：「thank you」。

原文刊登於 Yahoo 娛樂圈