李英愛相隔20年再演大長今 新劇10月開鏡明年播放
2003年播放嘅韓劇經典作《大長今》令韓流席捲亞洲，一直有消息指唔少公司想拍《大長今》續集，而韓國方面有報道指，曾製作劇集《犬系戀人》、電影《無聲吶喊》等作品嘅製作公司Fantagio，將會開拍大型史劇《醫女大長今》，並預計在今年10月開鏡，最快於明年(2025年）初播出。而當年演主角長今而走紅嘅女星李英愛，亦順理成章出演女主角。
李英愛憑《大長今》大受歡迎
據報導指，即使李英愛演《大長今》深入民心，但佢都要經過試鏡先至獲得呢個角色，而且早喺去年6月已經試鏡成功，而製作公司近期亦落實編劇人選。有傳《醫女大長今》延續《大長今》嘅故事，講述長今成為醫女後的生活。
《大長今》由李英愛、池珍熙主演，2003年9月喺韓國開始播放，唔止韓國受歡迎，多個亞洲地區都有購買播放權。TVB安排《大長今》喺2005年初「炮灰檔」播出但創下奇蹟，全劇平均收視高達36點，大結局平均收視47點，最高收視50點。當年TVB搵陳慧琳唱嘅《大長今》中文版主題曲大受歡迎，TVB當時話事人方逸華更在多位主角來港時親自見面。
原文刊登於 Yahoo 娛樂圈