東張西望｜七旬婆婆被「劉德華父女」呃身家 身上僅餘6元仍深信唔係詐騙
TVB資訊性節目《東張西望》昨晚（17日）播出有關七旬婆婆Helen被「劉德華」和女兒「Hanna」詐騙嘅報道，Helen為一名獨居長者，靠綜援過活，佢於《東張西望》透露今年1月收到一名自稱係「劉德華」人士嘅訊息，對方多次以生病買藥為由問佢借錢，又出動埋女兒「Hanna」用唔同藉口呃錢。Helen曾對「劉德華」指：「我話你夠膽呃我，我就夠膽俾你。」亦憑對方回覆對話時間斷定佢真係劉德華，堅稱「劉德華」唔係詐騙，直至劉德華女兒「Hanna」應承喺美國返港還錢但冇出現，Helen先話當用4萬幾蚊買個教訓。
Helen表示唔使錢都唔會睇劉德華演唱會
Helen表示自己唔係劉德華粉絲，認為佢唱歌唔啱自己，仲話唔使錢都唔會睇劉德華嘅演唱會，但就指與「劉德華」對話係因為想知道對方做乜，又因收到「劉德華」護照相，令佢堅信對方真係劉德華。Helen講述，「劉德華」多次以自己有病要買心臟病藥為由騙錢，對方仲話自己唔食就會死，於是多次向對方過數。
「劉德華」仲派出女兒「Hanna」齊齊呃Helen， Helen表示對「Hanna」百分百信任，覺得佢係一個乖巧學生：「佢話佢13歲，喺美國寄宿，佢叫我做老師，傾咗差唔多一個禮拜，佢就叫我Godmother，之後佢連個God字都唔用，直情叫我媽媽。」
而原來，Helen將擺放於家中嘅萬餘元借晒畀「劉德華」兩父女不特止，仲典當埋母親遺留畀佢嘅4件首飾；受訪當日指自己身上僅餘6元及八達通20元。不過，Helen仍堅信假父女係真，指憑與「劉德華」對話時間判斷佢係真劉德華，縱然由《東張西望》主持陪同下致電畀「劉德華」冇人聽，佢都仲係覺得冇問題：「我認為唔係呀！唔係唔想認得佢把聲嘅問題，我覺得佢見到我來電唔敢聽囉。」
Helen：接唔到劉漢娜就會喺鏡頭前道歉我自己蠢
直至Helen典當嘅物件到期，於是迫「劉德華」兩父女還債，「劉德華女兒Hanna」通知於5月1日學校放假時就會返香港，屆時亦會還錢畀Helen。但5月1日Helen再通知節目組，指「Hanna」早上買機票時欠500元行李費再問佢借錢：「我真係頭痕，都唔知點搵500蚊俾佢。但唔搵500蚊俾佢，機票啲錢就嘥晒。」於是又借咗錢畀「Hanna」，不過Helen就向鏡頭表示：「如果我5月2日接唔到劉漢娜，我就會喺《東張西望》嘅鏡頭前面，向《東張西望》所有工作人員鞠躬道歉，道歉我自己蠢。」
結果，翌日「Hanna」又再講自己喺新加坡過境期間簽證過期，被罰款2,000元，冇錢嘅話12時就會送到少年監獄。此時，Helen表示：「等佢坐監呀！經一事長一智。」又向工作人員道歉及封鎖「劉德華」兩父女。一個月之後，Helen曾解封過「Hanna」，得悉對方喺香港就相約喺港鐵站見面還錢，但Helen等咗約一小時都見唔到對方就報警，「Hanna」亦已註銷WhatsApp帳號。此時，Helen先表示之後都唔會再理「劉德華」兩父女，又指今次當買教訓：「4萬幾蚊咪交學費囉。」
原文刊登於 Yahoo 娛樂圈
