柳應廷Jer為《Chill Club》錄影，回應演唱會海報「嬲豬」風波。(娛樂組攝)
柳應廷Jer今日(12日)現身將軍澳為ViuTV音樂節目《Chill Club》錄影，他接受傳媒訪問，談到11月底個唱《Jer Lau "The Shape of Breathing" Live 2025》海報被指P圖、褪地和AI，他深宵在IG上水表示「嬲豬」，他笑言：「又唔係好嬲，嗰刻IG講嘅嘢，其實上水係為咗澄清，大家講AI、褪地、Backdrop 係key上去，其實我哋諗呢張poster已諗好概念，我都想撳個掣就有，但嗰日我哋花咗24個鐘去拍poster同Album嘅相，意念上都諗咗好耐，想做到鬆郁矇嘅效果，想演唱會定位同坊間好唔同，就係你估我唔到，你入場睇我演唱會先知道發生咩事。」
問到可有感到不開心？Jer坦言：「梗係有，因為背係做嘅努力真係好多。其實我好少會在網上咁樣表達情緒，因明白公眾人物，言行舉止都有人望住，要審慎經過腦袋先講，但嗰一刻好想講，我又唔係要大家鍾意呢張相，因為藝術好主觀，只係純粹想澄清，我哋喺呢件事上沒有馬虎。」
3D打印實物「樹枝服」
Jer出po後，仍有不少網民誤解他的意思，他自言忙於練歌和籌備演唱會，已沒有再深究網民反應，「我純粹想講背後團隊用咗好多時間心機研究呢張相，大家都覺得佢呈現到演唱會主題，我哋全部都好鍾意。」為拍攝海報，團隊特地以3D打印製作「樹枝服」，「創作團隊用咗好多時間心機組成，我真係笠著件衫影poster，好辛苦，唔係好輕嘅一件作品，希望遲啲有機會俾大家睇到呢件作品。」他表示當日亦有拍下攝製花絮，將來有機會發布。至於會否在演唱會舞台穿著，他笑言，「未必會，真係好重，孭住件衫未必唱到歌。」
接受意見 堅持做自由創作人
對於團隊與大眾的審美落差大，他認為可能跟大家預期有出入，正好為大家帶來驚喜。問到將來會否多考慮大眾接受程度時，他直言沒想太多，「出道7年，一直好多人建議我點樣做，但我一直都係做自己鍾意或想做嘅嘢，其他人嘅聲音我會接受，但希望做自由創作人，(有指你不接受批評？)其實我一向都好接受意見。」問到MIRROR兄弟可有安慰，他表示，「大家經歷咁多嘢，都已經心照，我感受到佢哋好支持，我一出poster就有share同like，已經係默默支持。」