楊卓娜早前眼角生蛇留下疤痕，如今仍然可以見到她的左邊眉毛上凹了下去。(娛樂組攝)
楊卓娜在今年初因為左額潰爛，令她以特別妝容出席頒獎禮，原來當時她發現自己第二次生蛇，更曾經一度以為因為在大陸拍劇時被蟲咬，令她延誤就醫。如今，卓娜的左額留下一個疤痕，加上凹陷落去，因此她做直播時，左眼眉毛總是有一撻陰影，造成永久創傷。
楊卓娜左額近眉毛的位置生蛇，但她一度以為是被蟲咬。
兩度生蛇大不同
卓娜表示一直都不知道自己會再次生蛇，她指數年前曾經在肚皮位置生蛇，而且因為太痛的關係，嚴重影響自己的工作及休息。她說︰「好似俾電擊、有尖利物件刺住身體， 痛到典床典蓆，全晚瞓唔到覺， 傷口受感染會流膿、潰爛，但個傷口埋得都算OK。同埋啲人話生完第一次唔會再生，加上自覺身體健康，無諗過會再生蛇！」她稱第二次生的時候，因為跟第一次完全不同，所以沒有意識自己再生蛇。
楊卓娜當時面容浮腫，甚至出現視力模糊，但她未當時不知道是生蛇。(娛樂組攝)
腫到變晒樣
卓娜當時回港要出席記招，當日她的面容非常浮腫，亦因為眉角位置出現一個傷口，她需要側身讓傳媒拍照，還記得當下她跟傳媒表示自己被蟲咬，已經塗了藥膏遲遲未好，亦很擔心留下疤痕。她說︰「真係同第一次完全唔同，因為佢唔痛，同第一次感覺唔同。佢係令我完全變晒樣，塊面又要好腫，郁唔到，視力都差咗，到我發現係生蛇嘅時候，傷口潰爛範圍已經好大，又流血水同膿，眼都擘唔大，我世界直情崩裂！」
睇錯醫生食錯藥
她坦言當時真的不想出席頒獎禮，她說︰「真係唔知點，流住膿去見人呀？我自己都過唔到自己關，人哋見到都反胃！我仲要係頒獎禮前兩日先發現生蛇，食啱嘅藥同抹藥膏。她指當時醫生亦以為她是被蟲咬，判錯症食錯藥，令她吃了很多無謂藥，錯過黃金時間。她因為今次經歷，呼籲身邊的親友打蛇針及一有懷疑要看醫生。問到現時凹陷的位置如何處理，她指已經造成永久的傷痕，就連眉毛也崩了一些，「我已經放棄，睇下之後有無啲美容儀器整下。」
煲湯養生益埋劇組
卓娜表示現時會非常著重健康，但奈何工作會日夜顛倒，只好爭取時間休息，同時服食不同補充劑，以及煲湯調理。提到拍《黑色月光》時，不少藝人透露卓娜會煲定靚湯讓大家飲用，她直認不諱︰「我拍劇係會買幾千蚊湯料，就算係大陸都會買湯料同煲，每一日都煲兩大煲等大家一齊飲。我都算係造福眾生，但我會睇住通告，喺唔影響情況下盡力煲。始終劇組飯唔夠營養，有時有啖湯飲下，食下湯渣係好好一件事。」
問到會否考慮推出自家品牌的湯包，她笑言現時市面有很多類似的東西，但亦開心每次煲湯時，都很受大家歡迎。
