現年43歲嘅楊思琦近年主力於內地發展，積極經營抖音、微博等內地社交平台；日前，楊思琦就同好多內地藝人一樣出PO為高考生打氣，不過佢嗰段加油歌舞片就惹嚟一大堆負評，被內地網民嫌棄佢舞姿老土、打扮騎呢、發音唔準及背景場地詭異等等。
日前，楊思琦喺社交網站上載片段及寫上：「跑得最快是你啦，秒針！高考生加油」為高考生打氣，片中佢喺一個充滿80、90年代舊廣州色彩嘅網紅小食店作為拍攝場景，穿上藍灰色紮染Tee及牛仔褲，配上老土又奇怪嘅舞蹈翻唱李克勤與王赫野合作嘅洗腦神曲《秒針》，再加上楊思琦喺演繹時甩beat兼發音唔準，令唔少內地網民睇完後都話好尷尬，及留言表示負評，例如「不看字幕，一個字都聽不清」、「這風格......」、「不要跳舞了 有點奇怪」、「只要你不尷尬 尷尬的是我們」、「佢背景好鬼屋feel 好靈異」、「其實不唱不跳可能更好看。」、「唉。。不要唱了 你還是回家直播吧」、「下次不要唱了」、「你無嘢阿嘛！走嘿晒音…..」、「無節奏感唔好搞d咁嘅野啦 唔知想點」、「唱歌真的一言難盡」及「你自己聽聽這唱的好聽嗎？」等等。
