麥沛東扮演的唐文奇，在片中一句「屈我啦！屈我啦！我冇問題㗎！」令人留下印象。
由楊偉倫和麥沛東主演的《正義迴廊》，票房走勢凌厲，麥沛東飾演的唐文奇，在電影裡其中一幕大叫︰「屈我啦！屈我啦！我冇問題㗎！」令人留下深刻印象，近日更被網民製成不同的meme圖，連他本人亦收到不少。他笑說：「幾得意呀，日常生活用到，好多朋友都有send返俾我。」
麥沛東的sticker上架一日即成冠軍。
蝦頭都有meme圖
麥沛東在社交平台限時動態轉載了不少「屈我啦」meme圖，亦有人製成sticker，短短一日已有3萬6千多人下載。飾演唐文奇家姐的蝦頭楊詩敏亦獲插畫家製作成meme圖，她也在網上轉載大讚好正。
