
盧鎮業為Zelos拍MV,兩人在台北雨中濕身相擁。
黃凱逸(Zelos)推出新歌《雨點》,今次MV找來小野盧鎮業合作,Zelos表示好多大學同學都是小野Fans,並稱:「之前同小野拍《瑪嘉烈與大衛-絲絲》嘅時候認識,本身已經好鍾意佢做戲同佢憂鬱小生嘅形象,今次MV要拍一take過嘅一場淋雨戲,入面要不停轉換情緒,真係要有返咁上下功力嘅演員先做到,而其實我一路諗MV都係諗住佢個樣去度橋,諗住如果佢唔做可能就轉橋。」Zelos續說:「《雨點》呢首歌對我嚟講係有一個情意結嘅,因為我寫呢首歌個陣,經歷緊我人生最黑暗最唔開心嘅時期,愛人離世,工作失意。面對前路茫茫,而且個天成日都落住大雨嘅時候,我記得我個陣每次落雨都會同自己講,只要捱過今晚,天空有光,我就唔驚。」
拍攝期間因為好凍,又要淋雨,所有人都好快進入狀態,原本劇情上不需要喊的Zelos,受到小野的情緒爆發影響哭了出來,但最後都無用到個take。本身Zelos 對MV設計是源於一句他自己好鍾意的歌詞,是來自陳奕迅作品《落花流水》中的「淡淡交會過,各不留下印」。一個好傷心的男人,在街到淋住雨,想透過雨點去沖淡其思念,突然有一個人為自己撐傘,陪自己行一段路,最後更攬了你一下。Zelos:「揀喺台北拍攝因為雨車好似方便好多,同埋咁啱小野要去台北工作,我就問佢可唔可以stay多一晚俾我。」小野又係一口答應,勁爽快,他更稱可以演喊戲好好發揮。Zelos自言都係第一次拍MV如此大陣仗,導演call了兩部雨車先夠這條長3分鐘的路程。「當時我同佢講好快會出,結果去到今年8月,足足過咗大半年。」《雨點》MV在去年11月於台北拍攝,由台灣導演豆子執導,小野今次淋住雨,迎著冷風,一個人在台北街道,他稱:「開心參與Zelos自編自導自演MV,喺mini crew製作下,確實Zelos喺現場係一腳踢,每個細節都跟得好足,對整個演出嘅行位、情緒起伏、角色關係都有充足討論。感覺自己參與緊一個好personal嘅作品,好似進入咗Zelos嘅心房,而我喺入面感到安心。數數手指都好耐冇拍MV,今次喺台灣同一眾年輕影像工作者拍咗一個晚上,好似返咗去讀書嗰陣,同朋友們去外地拍片的感覺,機動隨性,精神爽利!」