芯駖@COLLAR新歌《POSH》以揸車為主題。
COLLAR成員李芯駖Sumling，去年先後推出《SPYLING》與《讓思憶症發作》兩首個人單曲後，昨日(29日)推出今年首支派台曲《POSH》，歌曲以揸車為主題，Sumling形容歌曲猶如度身訂造，「第一次聽首歌，就感覺好似揸車咁，因為我最近考完車牌，好想從揸車中帶出自己想法：『揸車對我嚟講係一件幾有趣嘅事，但點解我咁遲先考車呢？因為我覺得自己唔適合揸車，但其實學車師傅話我揸得幾好，原來我一直畀自己嘅恐懼打敗』，我想透過呢件事，反映日常生活有啲嘢，我哋係自己打敗自己，未試過就話唔得，但原來試咗之後係OK嘅。」
圓夢獲日本老師編舞
《POSH》由ADILE、ANDREAH、Karen Yee、Victor Tse 作曲，周耀輝填詞、T-Ma及謝國維監製，內容講關於揸車，有別於上一首跳唱快歌《SPYLING》，《POSH》節奏澎湃，更專誠邀請日本排舞師編舞，芯駖指：「搵咗日本排舞導師編舞，佢係一個好出色嘅老師，我成日喺IG睇佢啲片，今次邀請到佢我非常開心，亦好多謝製作團隊幫我實現呢個夢想。」
挑戰最性感MV造型
猶記得《SPYLING》性感間諜造型，但芯駖表示今次MV比之前更性感、更少布：「當我知道造型比上次性感，我就落力減肥。而家我嘅體脂比之前再低咗，因為之前拍團綜，然後做舞台劇，跟住就錄歌排舞拍MV，冇乜放鬆狀態。」
芯駖媽loop爆MV
芯駖又大爆媽咪在家中長期loop她過去的兩首作品，成為她的流量擔當，她說：「媽咪都有嚟睇我做舞台劇（ 《你好，打劫！Reunion》），佢睇完淨係話『你都好辛苦，冇得抖，打呢份工真係好辛苦』，媽咪最擔心都係子女健康。」接著芯駖將忙於籌備於8月29日舉行的COLLAR第二次演唱會，屆時極可能會首次現場演繹《POSH》。
借Dream Car拍MV
提到COLLAR成員陸續考車牌，問芯駖決心考牌是否受其他成員影響？她表示：「有少少，阿Gao係第一個考車牌，我冇諗過自己可以一take pass，覺得自己冇乜方向感，揸落車先知自己好鍾意揸車，喺車入面好有me time感覺。」歌曲既以揸車作主題，團隊也特地借了一架紅色法拉利跑車上陣，搞到sumling心心眼，直言是心目中的dream car，盼有天真的可揸法拉利在街上飛馳。
立即更新/下載AM730手機APP 體驗升級功能
