「我願意做個逗號，待在你腳邊。」來自《擺渡人》原著小說《從你的全世界路過》的金句。一部由愛情小說改編的喜劇，伏味是有點濃，但演員陣容卻有一定保證，包括梁朝偉、金城武、陳奕迅、張榕容及Angelababy等，並且由王家衛監製，看來著實不是一部低質笑片。
文：Wing
圖：莊振邦、林俊源
金城武與偉仔相隔多年再合作，仍然非常老友。
張榕容甚少演出喜劇，笑言今次在前輩身上「學到嘢」。
偉仔在戲中表面是酒吧老闆，實際上是為世人消除苦難的擺渡人。
梁朝偉早前宣布加盟《捉妖記2》，近日又有喜劇片《擺渡人》上映，令粉絲們紛紛猜測，「笑匠偉仔」是否歸位。不論是愛情喜劇抑或瘋狂笑片，他近年都少有觸及，久違的韋小寶、阿飛，以至西毒、賴料布等經典喜劇角色，不止觀眾懷念，連偉仔本人都表示期待拍攝更多喜劇，「真係好耐冇拍喜劇，人年紀愈大，愈唔想拍啲咁沉重嘅戲，想拍啲輕鬆啲嘅嘢，只係近年遇唔到鍾意嘅劇本，同想合作嘅班底，所以先咁耐冇拍啫。」
喜劇嘉年華
跟偉仔合作無間的王家衛，今次暫且當「軍師」，擔任《擺》片監製，由原著作者張嘉佳執導，而演員陣容則有偉仔黃金拍檔金城武，以及張榕容及Angelababy等，「今次團隊都係我熟悉嘅人，咁耐冇演，都係諗住試下，咁當然啦，有王家衛監製一定更安心，而導演張嘉佳雖然新，但佢係故事作者，對所有人物、整個戲嘅調子都好清楚……今次故事同我嘅喜劇舊作比，多咗好多元素，有瘋狂搞笑，有輕鬆，亦有感人愛情，成個喜劇嘉年華咁。」
發現自己
「生活上，好多人都可以係你嘅擺渡人，你亦可以係好多人嘅擺渡人。」偉仔說。「擺渡」意指解難，戲中由偉仔飾演的酒吧老闆陳末，就是故事裡的萬能擺渡人，「我喺戲中『醫』好咗好多人，最後亦『醫』埋自己。我相信，每個人喺生活中都會遇到困難及問題，有啲問題，可能自己一直睇唔到，反而會好似戲入面嘅陳末咁，透過幫人而了解自己，發現自己都有同樣問題。」《渺渺》金馬提名最佳女主角張榕容，在戲中飾演女配角毛毛，首次主演喜劇的她說：「我在現場偷偷學偉仔怎麼演，他也算我的擺渡人吧！其實我常常都當擺渡人，可能比較開朗吧，朋友失戀都會找我帶他們去玩，然後他們會開始哭，然後就沒事了，就像戲裡說的，每位落水者都會經歷4個階段──『我來了』、『我累了』、『我好了』、『我走了』，偉仔以至我們每一位演員，其實就是融合角色背景來演繹這4個階段。」
《擺渡人》上映日期：12月29日