林敏驄和陳穎欣Yanny在《觸電》首次合作演父女。(吳康琦攝)
港產片《觸電》以電競作題材的，集合林敏驄、陳穎欣(Yanny)、柯煒林(Will)、羅莽、馮素波、伍詠薇等老中青三代的演員，意外地火花十足，爆發超強喜感。林敏驄和Yanny首次合作演父女，面對向來愛爆肚的聰哥，Yanny秘訣是夠瞓，「有時唔夠瞓，思維比較慢，就接不住聰哥。」問到Yanny可有經常「焗蟹」時，驄哥就爆料，「佢老母(伍詠薇飾)焗得多啲，死焗爛焗，以為好醒，最後都忍唔住。」
首拍電競題材 𦧲飯應
林敏驄不時客串演出電影，但上次主演已是2019年自編自導自演的《如珠如寶》，問到為何接拍《觸電》，阿驄笑言，「主要係錢，雖冇八位數咁多，但跟我拍劇差唔多，拍劇要拍3個月，呢套只拍10日，當然係𦧲飯應。」接著才認真表示，「未拍過電競題材，其實都可當作是運動，因為代入角色，運動量都好大。」他表示事前有專人教授技術，「有些高手看完我演出，發覺我才是真正高手。」Yanny補充說，「最重要係姿勢，很多人打機以為鍵盤打橫，原來真正專業的人要V字型，配合一個弧度，否則就會好攰。」
打足兩日機變腐女
Yanny自爆曾經沉迷打機，「最誇張是兩天都在打機，食物放側邊隨身拎起就放進口，頭髮好核突，好像睇戲那些腐女，真係冇擦牙洗臉。」驄哥聞言即表示，「聽到都覺得核突。」他自豪地表示，「我從來都唔沉迷，好清醒，點到即止，夠贏就可以。」Yanny大讚驄哥轉數快，「我就係打極唔贏，過唔到關，先玩到咁。其實驄哥好聰明，仲好有內涵，問佢好多嘢都識答。而且拍戲好專注。」戲中驄哥與Yanny父女檔，跟羅莾師傅在柯煒林帶領下，組隊參加電競比賽，他大讚新生代演員有活力，「佢青春無敵又醒目，如果唔係點做我個女！阿Will都好醒明又有經驗，跟發哥都合作過，所以都夾得好好。」Yanny表示也有問候早前確診患癌的Will，「佢性格好tough，反而同我講佢無事啦。」
堅持信念做自己
林敏驄演網吧老闆「車仔」，人到中年面對行業式微，參加電競比賽盼贏錢翻身。驄哥在娛樂圈打滾逾40年，身兼演員、節目主持、填詞人及跨媒體創作人多個身份，他半說笑道，「很少人唔認同我嘅能力，未死過？」他認為最重要有自知之明，「其實你做人、拍戲或開機舖，都要有信念，你想做甚麼？你要怎樣做得比其他人好，才會看到成功目標，至於做唔做到？盡力啦！」作為明星足球隊成員，他再以踢波作例子：「其實踢得有幾好，你要自己知，無論創作或演戲，都要有自己特色，你怎樣發掘或看清楚自己，有甚麼與別不同，依照性格，做返自己就夠。」
跳唱唔達標好氣餒
Yanny在《觸電》演的菲菲被看為廢青，但其實很清晰自己喜歡甚麼，當知道不適合就決絕放棄，她自言這方面的性格跟角色相似，「我以前做女團(Super Girls)，我做盡所有努力跳舞唱歌，都覺得自己未達標準，其實都好氣餒，可能我的天份就是這樣，所以跟公司說想嘗試做演員，現在覺得找到適合方向，好享受好鍾意，找到滿足感。」
做兼職追夢 絕非廢青
Yanny慶幸有機會加入「試當真」，獲得不少演出機會，對於新生代演員被指難與前輩相比，就認為是機會問題，以往電影巿道蓬勃，較多演出機會推動自己進步，「現在少了機會去磨練，容易被誤解，我身邊好多演員朋友，就算冇工作沒戲演，都會做外賣、做地盤、做駕車等維生，為了夢想點都唔放棄，絕對不是廢青。」面對電影業市道低迷，林敏驄要自己轉方向，就像《觸電》獲電影發展基金資助，他坦言，「自己都有戲開拍唔到，現在老闆沒什麼錢，那就做其他工作，開下演唱會，我咁多瓣數，就拎一瓣來頂住，可能我轉得快，呢度塞車就走另一條路，所以都冇塞住，係心態問題。」
文：Grace 攝：吳康琦
化妝：Melody Chiu(Yanny)
髮型：Calvin Tsoi@HAiR(Yanny)
服裝：Max & Co(Yanny)
場地：合和酒店 HOPEWELL HOTEL
ADVERTISEMENT
立即更新/下載AM730手機APP 體驗升級功能
