許冠文認為現在的自己是人生最燦爛的時候。(吳康琦攝)
現年82歲的許冠文今日(3日)出席香港恒生大學第五屆榮譽博士學位頒授典禮，獲頒授榮譽社會科學博士，太太、兒子，孫仔孫女均有出席見證重要時刻。典禮期間，當常務暨學術及研究副校長莫家豪教授宣讀讚辭時，概述許冠文從影生涯，當提到《破·地獄》角色「Hello文」時，全場拍掌歡呼，可見角色深入民心。
《破‧地獄》解答多年疑問
問到人生最燦爛的風景是甚麼時候，許冠文思考了一會並答說︰「最燦爛係依家，因為我睇通咗啲嘢，尤其是《破．地獄》嚟講，我一生追求人生意義其實係咩呢？我成日都講人嚟呢度係做咩唔知，目的又唔知，死咗之後又唔知去邊，三樣都唔知點會快樂，日日返工係做咩嘢？我成日諗個意義，直至睇《破‧地獄》劇本，呢兩位編劇好勁，答到我個問題，原來生命唔係在於意義，因為人生只得一次，橫掂上咗車，你一定會落車，有一樣係肯定係會死，目標唔係重要，意義就係欣賞沿途風景，做人要享受到盡先至係勁。」
他續說︰沿途風景係包括你身邊嘅人，你諗下回憶一生，你珍惜嘅人加埋嘅好命有十個八個，所以要欣賞旁邊嘅人同你一齊，再遠大啲要連敵人都欣賞埋，除非人哋好離譜，否則大家嘅嘢都係一齊啦！原諒佢就原諒佢，生命好短，無論你愛嘅人又好，敵人又好，都係個轉車，呢個係我拍《破‧地獄》得到最大嘅收穫。未來如果再有戲拍，或者編導都好，都會走呢個方向，除大笑之外，都要有啲意思。」
衛詩雅朱栢康演技好犀利
他稱上一次失落金像獎影帝沒有失望，因為獲提名已經好犀利，「今屆提名個5位都好勁，邊個拎唔拎到，都係各花入各眼，藝術嘢真係好難講，我冇咩失唔失望。」對於戲中的子女均獲獎，他大讚衛詩雅及朱栢康演技好犀利，並指有份參演該電影的人都非常勁，水準很好。
煮餸比喻香港電影業
他說︰「香港仍係充滿希望，未來香港係點，每一行都會尋求新嘅路線，電影就尋求緊。其實電影今年好好環境，因為有兩部戲過億，即係話觀眾唔係唔睇，係有錢而係等一部有料嘅。一係唔食，一係就煮餐好咁解。我個夢都係點樣煮餐好俾大家食，希望全世界都睇到香港嘅電影。」他認為儘管戲院有不少關門，他再以煮餸作比喻，「你張枱好靚都冇用，你煮啲嘢要好食先得，就係億億咁嚟，但點樣煮呢？有樣嘢一定啱，就係我哋要試新嘢，未見過嘅，未聽過嘅嘢，好大程度上要搏一搏新嘢。」
立即更新/下載AM730手機APP 體驗升級功能
