Ad Block Ad Block
娛樂
2023-01-19 12:08:00

迪士尼新CEO做到嘢?Marvel電影3年半後重返中國內地市場

分享:

係內地政府為咗救返因為疫情而進入寒冬嘅戲院業,定係迪士尼換咗CEO上場真係有用?事隔3年半,漫威電影終於重返中國市場!外媒Deadline報導,MCU嘅《黑豹2:瓦干達萬歲》將於2月7日喺內地上映,而作為開啟第5階段嘅《蟻俠與黃蜂女:量子狂熱》則與北美同步於2月17日上映。

對上一套喺大陸上映嘅漫威電影已經係2019年嘅《蜘蛛俠:決戰千里》,成個第4階段包括《黑寡婦》、《蜘蛛俠:不戰無歸》、《奇異博士:失控多元宇宙》、《雷神奇俠4:愛與雷霆》全部無影。由梁朝偉、楊紫瓊、陳法拉等主演嘅《尚氣:十環幫傳奇》及由金像導演趙婷執導嘅《永恆族》,兩套分別因為「辱華」同「講真話」而上映無望!

Bob Iger回巢 內地即上2套漫威

Disney上手CEO Bob Chapek曾豪言Marvel無咗大陸市場都一樣有好成績,而且有更多創作自由,不過Disney班股東明顯唔同意,召返過緊退休生活嘅Bob Iger出山再次接管Disney業務。Iger退休前掌管Disney 15年,相信同大陸政府關係相當良好,一回巢即刻搭通大陸票倉,連上2套漫威電影!

不過又唔止Disney要錢,內地成個戲院業務亦相當低迷,因為防疫措施令票房收入比上年跌至少36%。2022年唯一一套外語大片《阿凡達:水之道》都未能救市,以為內地觀眾餓咗咁耐無西片睇,一定會收得?點知《阿》搵埋章子怡配音都只係收得12億人仔,大跌眼鏡!

放寬防疫後票房仍慘淡

現時解除防疫限制亦幫唔到幾多,票房似乎不升反跌,賀歲超級檔年年都有一套戲收至少幾十億。今年片單唔弱,有大IP、大導演作品又有人氣演員《滿江紅》、《無名》、《流浪地球2》等電影上映。不過幾套預售加埋剛剛過億,同往年《唐人街探案3》一套預售都過6億差天共地!又睇下漫威重返內地市場後,可唔可以再創票房紀錄。

原文刊登於 Yahoo娛樂LOL,am730獲授權轉

Ad Block
請接受以下私隱政策及免責聲明,以示你同意am730內之私隱政策及免責聲明。了解更多
接受