連詩雅接受電台節目訪問談家庭。
現年37歲的連詩雅（Shiga），為產後復出樂壇的新歌《人生使用說明》接受雷霆881商業一台《星光背後》專訪。
Shiga因2019年拍攝旅遊節目《12個夏天》而邂逅比她年長兩歲的男神陳家樂，二人於2020年開始交往、2023年結婚、並於去年７月誕下女兒Camila。情路經歷不少波折的Shiga不再慘情，《人生使用說明》是總結她曾經任性的前半生。節目中，她詳述與陳家樂由交往、求婚到結婚生女的甜蜜經過，Shiga形容與老公能修成正果是因為，「係適當嘅時候遇上適當嘅人。」
連詩雅與陳家樂拍拖兩年，已認定對方能付託終生。
Shiga指當初夥陳家樂赴韓國拍《12個夏天》時，二人當時都各有伴侶沒想太多。及至翌年陳家樂邀請她上網上節目《三夫當關》，適逢二人同時回復單身才開始約會，談及老公最初吸引她的原因，她說：「係純品，有咁上下樣貌嘅男仔，多數係花花公子。但佢反差好大，好old school style。係夜晚要聽收音機瞓，朝早飲茶睇報紙嗰啲！佢叫飯可以日日食同一款男人飯，同我最初想像嗰啲男人好唔同。而佢仲有種傻氣，我亦欣賞佢嘅傻氣，畀到我穩定、同佢一齊好有安全感。」Shiga形容陳家樂的浪漫就是給她放心，並稱：「對於我，就係好浪漫。譬如佢去邊，他會自動自覺話：『我到喇！我做緊乜呀！』我從來無話要check住佢，但係佢好願意分享畀我聽，我就覺得好浪漫。」
拍拖兩年已讓她感覺陳家樂能付託終生，原來是源於二人曾因疫情分隔兩地三個月，Shiga說：「我超級討厭Long D，但疫情最嚴重嘅時候，我好矛盾要返內地拍劇三個月。但嗰三個月，佢令我完全放心，嗰時我哋靠facetime見，佢會特登約我拍完劇各自返到屋企，一齊打開facetime食飯，臨瞓又開住facetime揀一套戲一齊睇。真心覺得佢唔使做呢啲嘢，但係咁，佢就令我好安心。佢知我係一個缺乏安全感嘅人，佢就畀呢樣嘢我，而佢咁有耐性做呢件事，就令我諗到佢係一個可以結婚嘅對象。」
至於婚後不足一年就成功懷孕，Shiga坦言是計劃亦是意外，「係想有小朋友，所以無特別避孕，但無諗過咁快、咁順利！」Shiga指自己生理期一向不準，大懵至懷孕兩個多月才醒覺要驗孕：「最初仲以為感冒頭暈，係兩個幾月先試吓驗。發現真嘅時候，係好surprise。」她更指陳家樂得悉自己要當爸爸時，不如外間想像般激動，Shiga說：「嗰日佢放工返嚟，我嗰刻好開心又有好多情緒，佢一開門我就爆喊，佢即刻問我：『乜事？做乜事？』我喊住話：『你做爸爸啦！』佢好冷靜話：『咁咪好囉！我哋係想有小朋友嘛。』或者當時太突然，佢無太大感受，係隔咗幾日佢陪我去產檢，當佢睇到個mon，再聽到BB『噗噗』嘅心跳聲，佢就流眼淚，我哋兩個都一齊流眼淚。」
Shiga不諱言首胎就是想生女，談到老公，她說：「以前佢想生仔，想同囝囝一齊做運動。但因為我哋屋企有一對狗狗係一仔一女，佢好嗲個女，就話有個女都係好sweet。」至於這麼快瘦身復出又演舞台劇又唱歌，Shiga指仍想於事業上再衝刺。至於她復出是否代表暫沒計劃追多個，她說：「我自己隨緣，老公係想，佢想有個囝囝，佢成日講笑話：『唔生啦，除非下一個係仔啦！』但唔係你plan就有，真係隨緣，我而家係學識去感受同活在當下。」
ADVERTISEMENT
