釗彤離開Beanies獨立發展 新歌MV著婚紗參考《天若有情》
前女團Beanies成員潘釗彤(Chiutung)，近日以獨立歌手身份回歸，推出首支個人作品《世界上最爛的人》。選擇離開Beanies的決定，她稱與經理人出現信任問題，未能達成共識，基於互相尊重下，選擇獨立發展闖樂壇，「好慎重咁考慮到可能分開對於大家都有好處，先會分道揚鑣。」釗彤表示與Beanies隊友依然是朋友：「確實係冇以前一齊工作時咁親密，不過大家都係『陳輝陽X女聲合唱』出嚟，所以都有一定嘅經歷，最後佢哋尊重我嘅決定，我都尊重佢哋！」
身為唱作人的釗彤，以音樂創作為重心，最新個人作品《世界上最爛的人》選擇親自作曲，填詞的部份則邀得林若寧參與，「好榮幸可以有林若寧先生嘅歌詞，因為之前嘅作品全部都係自己填。」釗彤表示新歌描述「愛上壞人」的轟烈愛情故事，「自己嘅戀愛經驗唔多，所以交晒俾林若寧師傅發板！喺完全未溝通嘅情況下，佢翻聽晒我之前嘅作品，好直接話『釗彤係個幾tough嘅女仔』，於是就寫咗呢個愛情故事。」釗彤自言不是戀愛腦，面對愛情比較理智，但女孩都想有轟烈戀愛，所以用音樂作品來表達。
自認爛人曾傷男孩心
釗彤透露，因為離隊發展，加上新歌改名《世界上最爛的人》，令很多人問她誰是爛人。她直言不諱：「其實個爛人係我！」她回想自己中學時期，曾經「誤傷」喜歡自己的男生：「嗰時真係唔知咩係談戀愛，咁啱有人同我表白。我就應承咗做佢女朋友啦，仲記得佢嗰吓興奮到跳起，但係我就即日提出分手，因為佢拖住我嗰陣，發現自己冇心跳加速嘅感覺。」她指新歌不是為此而寫，對這位男生亦亦印象模糊，但回想經歷仍有點不好意思。
提到MV穿上超性感晚裝及婚紗街頭狂跑，釗彤笑說：「着住婚紗跑真係唔易，不過出嚟成件事好有感覺，我自己勁鍾意。因為講愛上『壞人』，我就諗到電影《天若有情》嗰種，勁轟烈又浪漫。尤其一個女仔咁投入戀愛嗰陣，唔多唔少都會幻想『我願意』呢幕嘛。」
ADVERTISEMENT
