Ad Block Ad Block
娛樂
2022-11-15 16:18:26

鈴芽之旅 | 新海誠極催淚新作日本開畫打低《黑豹2》

分享:

 

剛上映嘅Marvel電影《黑豹2:瓦干達萬歲》氣勢如虹,上映4日美國本土收近1.8億美元,成為今年美國開畫票房第2高電影,全球大收3.3億美元(約25億港元),全球各地差唔多都係票房冠軍,除咗日本!

邊套打得贏漫威《黑豹2》咁犀利?咪就係知名動畫《你的名字》、《天氣之子》導演新海誠最新作品《鈴芽之旅》。

日本票房壓《黑豹2》

 

新海誠前作《你的名字》紅遍全亞洲,互換靈魂嘅橋段仲吸引咗美國《星空奇遇記》大導演J. J. Abrams 買入版權改編成真人版電影,並由《魔龍王國》導演Carlos López Estrada 執導。其作品有票房有口碑,《你》日本首周開畫錄得12.8億日圓,香港大收3000萬票房,成為香港第2高票房動畫!

隨後嘅《天氣之子》日本首周票房達16.4億日圓,殊不知今次《鈴》仲勁,再次打破紀錄,首周錄得18.8億日圓票房壓過《黑豹2》!《鈴芽之旅》同《你》、《天》一樣,同大自然災害有關,《鈴》直寫日本311大地震,日網評價電影無論畫面及情節都非常細膩,淚線大開收唔到咁話。

故事簡介

電影講述住在日本九州鄉下地區嘅17歲少女鈴芽 ,4歲時母親遇上海嘯失踪。鈴芽遇到四周遊歷搵「門」嘅少年,為咗找尋母親嘅下落而跟隨少年入去山中廢墟。鈴芽打開咗廢墟中嘅古老大門,引致日本各地嘅「門」同時打開,如果唔閂埋啲門就會出現災害。

鈴芽因此展開閂「門」之旅,每道門包含咗鈴芽心靈嘅成長。女主角鈴芽由《晨曦將至》日本女星原菜乃華聲演,要配音都唔易,佢經過多次面試,擊敗咗1700人先成功獲選為《鈴》配音。另一人氣男星染谷將太則聲演角色岡部。香港暫時未有映期,不過應該實有得睇。

原文刊登於 Yahoo娛樂LOL,am730獲授權轉載

請接受以下私隱政策及免責聲明,以示你同意am730內之私隱政策及免責聲明。了解更多
接受