關智斌收起腹肌出席運動會。（娛樂組攝）
關智斌今日（10日）出席《樂動新城•慈善運音會》，他接受訪問表示：「運動會真係好耐冇參加過，我連喺香港嘅活動都好少參加，我諗返起啱啱出道會參加好多唔同電台嘅運動會，我記得連我哋公司（英皇）都有搞過。不過現階段就冇人再叫我參加，可可能驚我仆親同受傷。」他分享兩星期前曾經參加健身比賽，並表示：「嗰個比賽全部人都除衫，一着衫呢就會好弱，雖然唔係話每一個人嘅身材都好勁，但係就輸人唔輸陣容。」
提到網民激讚演唱會海報中呈現好身材，他表示：「係咪㗎？我覺得OK嘅。冇話完唔完美嘅，最緊要健康。」被問到對自己的身材評分，他說：「我覺得65分。我嫌我個胸部唔夠大，膊頭可以再闊啲，我覺得做運動嘅人好煩，永遠都會覺得唔夠，想鍛鍊一個好嘅身材喺演唱會呈現。」
講到老闆楊受成不願看他在演唱會騷肌肉，他說：「因為老闆有啲滯滯哋，因為成日都見到我哋露胸露臂，我哋公司其他嘅男藝人都係咁。其實又唔係話故意露身材，其實係呼應返海報，裏面其中一個訊息就話赤裸去講自己嘅故事。」
關智斌笑謂老闆不會想看他騷肌。
提到好友江𤒹生 （AK）在社交平台留言「收返埋個八字，唔好亂咁俾人睇」，他笑言：「佢叫我八字，呢啲咁私人嘅嘢就唔會俾人睇，唔好亂騷啲八字，就係咁樣嘅意思啫！」講到會否請AK擔任演唱會，他表示：「現階段rundown都未清楚，不過唱歌遇到佢有傾幾句，佢都話好support會嚟睇。」
ADVERTISEMENT
😋請你嘆香港迪士尼20周年下午茶👇立即登記👇
