阮小儀効力商台30年，今年8月才獲頒長期服務獎。
下月55歲的阮小儀効力商台30年，多年來與森美拍住上擔任DJ，創造出不少節目，大受歡迎。今日小儀於節目《早霸王》突然宣布已經辭職，工作期至10月31日，在節目中指小儀並非健康有事，只是想開拓新的人生 ，並笑言：「我成日話佢唔重要，但有影響力有」而小儀續指自己的積蓄可以足夠生活，所以希望有多點時間陪伴屋企人，以及享受人生。
參與《墨魚遊戲2》
今年8月商台舉行66周年晚宴，阮小儀則獲頒「30年長期服務大獎」，小儀表示：「轉眼30年，我以為還是25年，真的快樂不知時日過﹗」不少聽眾得知消息後，都表示相當驚訝，很多人都表示不捨，並指今年的叱咤頒獎禮沒有了小儀非常可惜。森美、小儀一向是大眾心目中的最佳拍檔，如今小儀離開商台，聽眾當然大感不捨，而兩人最近亦會一同參與試當真最後作品《墨魚遊戲2》。
小儀：離開的確需要勇氣
中午時份，小儀更新社交平台，在IG發長文大談離開商台的心情，她寫：「如喺節目講嘅一樣，我走喇。喺商業電台工作已經30年，自己都冇諗過可以咁長情...一段關係可以咁長久，必定係雙向嘅，你對我好，我亦好愛你。但，對唔住，我想喺而家行開一下，大膽地畀自己放手，去投入人生另一條航道。離開的確需要勇氣，我都考慮咗好耐，所以你唔駛替我可惜，亦唔駛多疑覺得有乜嘢問題發生，只係我覺得現在剛剛好。各人都有自己人生嘅時間表，節奏亦都唔一樣。我今年好純粹地選擇想喺11月自己生日月開始，好好地完結本身嘅崗位，然後誠實地安然地去開始我另一段小路。嚟緊嘅呢場人生，我有好多嘢想做，有好多嘢想試，總之就係想喺呢段日子去見識下，去感受下，去學習下，去嘆下，去寵壞下。我仍然會工作，因為仍然要食飯吖嘛，所以唔係乜嘢搵夠呀嗰啲。況且，接觸過嘅客戶們個個都好錫我，我會做好自己，有機會繼續要合作愉快。10月31號就係我喺903 last day，希望大家陪我喺剩下嘅on air日子，開開心心、大大聲聲嘈之巴閉咁去渡過。」
ADVERTISEMENT
