由《聲夢傳奇》學員及《盛‧舞者》參賽者主演的無綫青春劇《青春本我》，將於本周日晚大結局。
劇集前後推出了多首原創歌曲，《#即影即友》、《青春本我》、國語歌《別難過》及《複雜》等；其中9首歌曲將收錄於2月14日推出的《青春本我》電視原聲歌曲大碟，為確保歌曲質素盡善盡美，大碟監製Johnny Yim特別將大碟交到被英國政府列入英格蘭遺產的Abbey Road Studios作母帶製作，而Abbey Road Studios最著名的客戶是英國著名樂隊披頭四。
是次聲夢學員除了參與劇集拍攝及原創歌曲獻唱外，Aska、蓮姐、Archie、Rock及Aeren更參與了作曲及填詞的創作部分。Aska坦言最喜歡Gigi的《複雜》，並指自己在填詞方面花了很多時間：「因為填詞嗰陣諗咗好多，我唔想個歌詞淨係Apply落Gigi個故仔度，我想啲詞令到好多唔同嘅聽眾聽咗之後都會有少少共鳴。」與Aska攜手為《複雜》作曲的蓮姐，受訪期間突然Gigi上身大唱特唱，她笑言：「我作曲嗰時不停幻想Gigi會唱成點，同係咁扮佢嘅唱法，Aska都讚我花咗好多心機喺扮Gigi唱歌度。」十分搞笑。
至於為Chantel的《靈魂伴侶》填詞的Rock，則笑指重拾初戀感覺最難：「我嘅初戀已經離我太遠，我已經唔係好記得喇，有啲難度。」Archie則感激負責作曲及編曲等多項工作的監製Johnny Yim從旁帶領及協助：「其實好驚唔知自己能力同大眾要嘅能力係咪相符，好彩有Johnny Yim幫忙，我哋啲作品先可以出到街，否則我相信應該冇一個人嘅作品可以出到街。」
此外，大碟的封套及CD設計亦相當有心思，首先大碟採取了DIY封套設計，劇迷及樂迷能夠根據個人喜好，摺疊出最啱自己口味的心水封面；CD方面則分別有Gigi、Chantel及Yumi 3款不同頭像設計，更是隨機出現在大碟內。
