2025-07-31 15:45:00

香港小姐2025｜7號施宇琪親揭與林作關係自爆有圈外男友拍拖八年

14位候選佳麗今日（31日）出席《2025 香港小姐競選》外景出發拜神儀式。（娛樂組攝）

14位候選佳麗今日（31日）出席《2025 香港小姐競選》外景出發拜神儀式，7號候選佳麗施宇琪(Angela Stanton) 今日接受《am730》訪問分享現階段的心情：「有少少忐忑，因為身材真係要騷出嚟，真係要俾少少信心自己。」她繼續指現時非常專注鍛鍊身體，並表示：「我每日都會跑三次步，同埋會做唔同嘅鍛鍊，仲會攞個體重磅量度重量，先再夠膽食嘢。我從參選到而家都瘦咗4kg！」

7號候選佳麗施宇琪(Angela Stanton) 今日接受《am730》訪問分享現階段的心情。（娛樂組攝）

透露家族5代都是劍橋畢業生

其實施宇琪是混血兒，她的父親是英國人，媽媽是香港人，家族5代都是劍橋畢業生，講到有指家族有份建立香港的聖約翰座堂，她表示：「呢一個我唔回應。」至於家族5代都是劍橋畢業生，被問到讀書時期是否以考入劍橋為目標，她說：「我細個嘅時候的確以入劍橋為目標，因為我爸爸同埋爺爺前幾代嘅人都有讀過劍橋，我作為獨生女，應該由我去承傳。」

親揭與林作關係

提及林作昔日曾經力推參加選美一事，她表示：「我已經唔記得咗佢有同我講呢句說話，我的確係有一個party見過佢，我諗都有五六年前。」被問到是否二人關係不太熟，她直言：「唔熟，不過我有見到佢力撐我，不過唔熟。」

提到是否熱衷幕前工作，她說：「都可以試吓嘅始終我係一個好有分享慾嘅人，通常都係分享嘅工作嘅經驗，或者鍾意睇吓啲咩書，都可能係正面少少嘅嘢。」她表示自己最希望能夠擔任主持工作，並說：「我從來都未試過主持，所以當試吓新嘢，我最希望可以做到人物專訪，認識多啲優秀嘅人，無論咩範疇都可以，例如金融或政治嘅都得。」講到是否有信心勝出今次選美競選，她直言：「一開始其實我以三甲為目標，純粹覺得體驗更加重要，會令成個人放鬆啲，因為我之前都係比較緊張嘅人。」

自爆有圈外男友拍拖八年

講到出街是否試過有男仔搭訕，她直言：「我有男朋友架！男朋友係圈外人，都拍咗好多年拖，如果有人同我搭訕我都唔會理。」她分享與朋友拍拖已經第八年，不過並未有計劃結婚。至於男朋友對於參選一事有否給予任何的建議，她說：「佢同家人同埋朋友都一樣叫我盡量去放鬆，同埋叫我享受呢個旅程，當去度假同埋玩吓，都俾到好多信心我。」她指男朋友亦沒有介意選美需要穿着泳衣登場。

被問到有人指外貌似張栢芝，她回應：「咁樣簡直侮辱咗張栢芝，我覺得我有自己嘅美，但絕對同張栢芝係唔同Level，我估我嘅美唔係外在美，睇其他方面會好少少。」她亦有分享有人覺得她外貌似林夏薇。