《2025香港小姐競選決賽》圓滿結束，三甲分別是冠軍陳詠詩、亞軍施宇琪、季軍袁文靜。 (鍾式明攝)
《2025香港小姐競選決賽》圓滿結束，三甲分別是冠軍陳詠詩、亞軍施宇琪、季軍袁文靜，友誼小姐以及最上鏡小姐均由李尹嫣奪得。
今屆港姐盛會完結後，TVB安排三甲接受訪問，亞軍施宇琪和季軍袁文靜一同受訪，施宇琪表示：「其實我有少少難以置信，我今日返嚟都係當參加一個party咁樣，我都係放鬆晒所有心態。」施宇琪自言非選美材料，因為自己不懂跳舞及唔識笑，形容：「可以攞到亞軍，好開心囉！覺得真係太好彩！」對於自己可以躋身五強，施宇琪自言感到驚訝，認為除了才藝表演不俗之外，其他表現也有出錯，或許是自己的臨場發揮夠真誠打動評判們。被問是否有點眼濕濕，施宇琪否認沒有落淚，旁邊的袁文靜即搭咀：「佢唔會喊㗎！」施宇琪自言是個堅強女性，至於被看似眼濕濕，她回應：「可能都有少少激動，不過其實我比較激動唔係因為攞咗亞軍，而係我可以終於放開懷抱咁食嘢！」
亞軍施宇琪和季軍袁文靜賽後一同受訪。
施宇琪決定參選港姐即努力減磅，結果成功減去40磅，並學習好台上儀態，她自言過去兩、三個月控制飲食至走火入魔，半年內勁減40磅非常辛苦，就算食一粒朱古力也要計到好盡，下星期終於可以休息一下，所以現時好希望食餐好，她數月來為減肥已沒有跟父母去茶樓飲茶，所以這幾天第一件事就是先與爸爸媽媽飲茶，他感謝家人的理解，施宇琪好開心終於重拾正常的社交生活，可以約朋友食飯及每個星期日跟父母飲茶，最後笑住補充：「同埋，同我男朋友拍拖喇！」由於一眾佳麗被大會收起手機，施宇琪暫時未睇到男朋友及親友的祝賀，她自言相當期待。問到男朋友是否有來捧場，施宇琪自爆另一半同樣是投資銀行的行內人，為了保護對方身份叫他不要現身，在電視旁邊支持已好開心。施宇琪稱奪得亞軍後有甚麼職責，坦言目前正一頭霧水。
季軍袁文靜從上海來港僅四個月，她本身並不懂得廣東話，談到參選原因：「因為TVB距離我屋企好近，我之前去科大返工10分鐘，但係我來TVB只係5分鐘，我覺得好近，同埋我想多交一啲香港嘅朋友，學吓廣東話，咁咪來參選囉，真係好很簡單，所以今日可以攞到季軍，真係冇諗過。」她表示當選後最想睡夠12小時，要跟家人好好大吃一餐，亦希望可以去旅行。被問到可有打算入行當演？袁文靜表示；「都有諗過，如果有機會我都想拍戲，想挑戰下自己。」
立即更新/下載AM730手機APP 體驗升級功能
