2025-08-05 14:30:00

馬賽自爆曾被古天樂當眾鬧爆半個鐘　為負面報道花7位數賣樓打官司

2008年港姐季軍馬賽，當選後被TVB力捧上位，好快就有劇拍仲唔駛做茄喱啡，過多一年就已經5套劇出街，2011年再拎埋「飛躍進步女藝員」，上位快過火箭。但係捲入同性緋聞後，馬賽形象即時破產，約滿TVB後轉到內地發展，期間認識紀姓男友。2019年1月，馬賽喺社交網站宣布婚訊，同年6月誕下女兒Camellia。近排馬賽轉型做埋保健食品生意，試過喺內地「擺攤」，喺社交平台就自嘲係「失業女藝人」。

馬賽重提「私人影片」流出：超級崩潰

喺香港久未露面嘅馬賽，早前接受資深娛樂傳媒人汪曼玲專訪，重提當年人生低谷經歷。馬賽自言受力捧嘅5年期間不停拍劇，每日工作十幾個鐘，而且無咩機會見世面。「我真係溫室中嘅小花……我喺TVB嗰5年，拍咗十幾套劇……好似困住喺溫室，身邊都係好多保護你嘅人」。到緋聞爆發，馬賽話當時不停內耗，又指出街嘅新聞「喺我嘅立場，全部唔係我睇到嘅嘢」。後來馬賽更加因為失眠嚴重，需要搵精神科醫生幫手，佢擔心自己會被醫生開嘅藥物控制，於是跟常霖法師學禪修。

馬賽指2014年「私人影片」流出一事令佢超級崩潰，決定同周刊對簿公堂，埋單用咗100萬，最後官司打到雙方要做調解。馬賽表示律師當時同佢講，如果官司再打落去要用多150萬，馬賽話要將入行時爸爸幫佢俾首期嗰層樓賣出嚟籌律師費，同時已經盤算要離開香港。但係離港決定令馬賽喺一個飯局上，被古天樂當住十幾人面前鬧咗至少半個鐘。「我諗冇一個鐘都有半個鐘……佢鬧我點解要離開香港？點解要喊？點解要咁軟弱？」。馬賽承認當年唔係好明白古生嘅苦心，「我係用咗好多年先明白……佢係想鬧醒我，只不過嗰陣仲未醒，只係想避。」所以訪問中馬賽都有表示好感激古天樂。

雖然離開了TVB，但馬賽與許多演員朋友仍有聯絡，早前上載照片，與劉松仁、馬國明、楊茜堯、韓馬利、江美儀等人合照。（小紅書@馬賽）

內地女製作人汪子琦2013年喺微博上載同馬賽歐遊嘅親密照，馬賽否認同性緋聞，而幾日後有周刊影到馬賽同汪子琦喺上海錫錫嘅照片，當時汪子琦同富婆Laura有密切往來，馬賽被指介入做第三者，隨即被TVB「雪藏」。汪子琦同Laura回應訪問時，先後批評馬賽大話連篇，大爆馬賽母女喺雪藏期間仍然同汪子琦遊埠。同汪子琦爆出緋聞大約半年後，一條見到疑似馬賽穿著性感內衣跳艷舞嘅片段流出，馬賽翌日見記者承認係片中人。馬賽因為「艷舞片」事件人氣不再，只係喺TVB拍多兩套劇，2015年底約滿走人。

原文刊登於 Yahoo 娛樂圈