2025-08-14 12:30:00

黃子華95歲父黃偉生罕有露面　同四大探長有交情仲係香港首位法拉利車主

「子華神」黃子華鮮有同家人出席公開場合，只係透露過自幼父母離異令佢童年唔太快樂。早前有內地媒體發布短片，聲稱喺廣東三水蘆苞鎮訪問到現年95歲嘅黃子華爸爸黃偉生，片段開頭記者就問「你係子華個爸爸，係咪呀？」，老人家回答「係呀」。

網民：睇完片先知黃子華係三水人

黃偉生受訪時話「蘆苞我都有地方（物業），我鍾意返嚟鄉下。我好關心家鄉」。黃偉生所住條村嘅黨委書記話，黃偉生近月返村住，見到有團隊每天做防蚊滅蚊，二話不說就捐啲錢做經費支持。黨委書記又盛讚黃偉生好有心，條村有咩困難可以向佢提出，佢會想辦法解決。片段中影到村委會為黃偉生發出嘅捐款證書，上面寫道黃偉生捐咗一千元人民幣。片中黃偉生行路要旁人攙扶兼撐拐杖，但喺訪問中講嘢幾清晰，除下墨鏡後更見到佢尊容，同黃子華確係有幾分相似。有網民睇完片先知黃子華係三水人，講笑話難怪黃子華喺《絕代商驕》入面叫佘詩曼做「三水妹」。

黃子華對生父印象：好叻好有自信而且口才好好

黃子華多年來受訪時不時提到成長故事，子華童年時父母離異後跟隨媽媽生活，但亦試過淪為「人球」，輾轉間同嫲嫲、外婆及媽咪同住。黃子華同後父以及三位同母異父細佬妹年紀差距太大，所以冇咩兩句。家庭生活不愉快之下，黃子華細個試過逃學，甚至因為同同學喺相思灣偷快艇而留案底兼守行為。

黃子華曾經提及對生父黃偉生嘅印象，認為爸爸好叻好有自信而且口才好好。的而且確，根據資深傳媒人查小欣為鷄記麻雀館老闆「鷄叔」林國強撰寫嘅傳記，鷄叔提到子華爸爸做電器生意，同四大探長有交情，仲話黃偉生係香港第一位法拉利名車車主。鷄叔又指佢爸爸1960年代擺壽酒時，子華爸爸黃偉生出手闊綽，俾人情嘅金額當年足夠買層四百幾呎樓。

原文刊登於 Yahoo 娛樂圈