TVB年度盛事《萬千星輝頒獎典禮2022》圓滿結局，當晚一眾藝人盛裝出席，場面非常熱鬧。相識多年嘅黃翠如及洪永城亦有孖住出席，二人更翹住手行紅地毯，雖然佢哋齊齊食白果，不過佢哋都好享受出席頒獎典禮，黃翠如更上載二人翹手合照，不過就被網民指佢消費洪永城。
黃翠如洪永城翹手被轟
黃翠如憑旅遊節目《遊走世界天與地》獲提名「最佳女主持」，不過就輸俾陳貝兒。頒獎典禮後，黃翠如上載與洪永城翹手合照，相片中佢哋兩個都笑到四萬咁口，並寫上：「看着這張相片，不知為什麼，有一種感覺是開學了，也有一種感覺是畢業了。#家人」，唔少網民紛紛留言話佢哋係最佳CP，例如「有咁好拍檔，真係有今生冇來世」、「難得好閨密一齊」及「好鍾意你哋，好cute。最正的CP」等等。不過亦有網民對佢哋嘅關係感到懷疑，留言「有種感覺友達之上戀人未滿」、「洪個正印唔會呷醋嗎？你成日post佢」、「Why she alway with this guy and not her husband」、「呢種女人，係老婆最憎嘅一種」、「黃翠如到人哋結晒婚仲喺度消費人老公講到懶曖昧，係都要搞住人搵存在感。」 及「人哋婚都結埋女都生埋，仲唔識避忌，有無諗過人哋老婆感受？」 等等。
洪永城太太有留言
洪永城太太梁諾妍亦有係呢個PO留言，指老公洪永城「個頭真係好大好大好大」，而黃翠如就回覆「佢最大優點，所有女仔喺佢隔離都會靚咗」。另外，洪永城亦有留言：「Post almost the same time」指大家差不多時間出PO，黃翠如回覆「你贏咗小小」。
黃翠如及洪永城於有線年代相識，一齊由有線轉到TVB，除咗拍攝多個旅遊節目之外，二人亦有合作拍劇，多年嚟都合作無間。二人互相陪伴對方多年，連網民幫佢啲寫咗篇「有一種友情叫洪永城黃翠如」講述二人關係。洪永城曾經喺訪問中提及舊愛十分顧忌黃翠如，因為覺得佢哋「有嘢」，而洪永城就話對黃翠如冇戀愛嘅感覺，不過就笑話唔知黃翠如對佢有冇嘢。
