李梓敬被眾多街坊指「發福」，自揭身高體重決心減肥
減肥唔只係女士嘅終身事業，新民黨立法會議員李梓敬就因為畀好多街坊話佢「發福」，一上磅連自己都嚇親，決心展開60日減肥計劃。
李梓敬喺社交網站分享最近呢一年擺街站，除咗「支持你！」，「繼續努力！」之外，聽得最多嘅街坊反應，就係「你肥咗好多喎！」，「你發咗福喎！」。李梓敬原本都冇乜為意，不過最近實在係太多街坊咁講，所以噚日久違地上磅，點知嚇親自己。
自揭身高體重
原來李梓敬體重達到人生巔峰！係154.4磅，佢話正常體重係145磅左右，最重嗰段時間，就係啱啱大學畢業，都只係150磅。除咗公開體重，佢仲公開埋身高，「作為身高5尺9寸嘅我，實在係有啲重。」為咗健康著想，佢決定踏上60日嘅減肥之旅。之所以咁公開，佢話係希望畀到更多壓力自己，唔可以放棄！佢提到從來相信天道酬勤，希望可以成功。
ADVERTISEMENT
