民建聯在元宵節前夕舉辦傳媒茶敘（陳芷晴攝）
民建聯喺元宵節前夕舉辦傳媒茶敘，送上祝福兼且表達對政府嘅期望。財政預算案上星期公布，民建聯主席陳克勤趁機話希望政府未來喺財政盈餘下派多啲糖。
財政預算案嘅「糖份」欠奉，陳克勤就介紹住啲「甜美」嘅新議員畀大家認識，話無論係男士定係女士，見到佢哋個樣都覺得甜美呀！新人當中，新界北議員姚銘讚賞政府大刀闊斧投資北部都會區發展，不過佢提醒要避免工程延誤，令到金錢用得其所，佢作為議員會做好監察嘅角色。九龍東議員張培剛就關注失業率高企，佢促請政府訂立標準，當失業率上升到某個水平就要停止輸入外勞。佢期望新一年百業興旺，人人有工開！
相信民建聯領導層無大變動
民建聯3月底前會完成換屆，陳克勤透露所有現任正、副主席都有參選，相信領導層唔會有大變動。不過，監委會主席盧文端因為希望有多啲時間陪屋企人，唔再競逐連任，意味監委會結構會有較大變動。
ADVERTISEMENT
立即更新 /下載AM730手機APP 體驗升級功能
