楊永杰（右）同梁文廣（左）今日舉行傳媒茶敍（陳芷晴攝）
立法會內有唔同版塊，不過上屆由4個直選議員組成嘅「A4」聯盟只係得返兩個人。成功連任嘅九龍中議員楊永杰，同九龍西議員梁文廣話「A4」聯盟係代表4個人，唔會再沿用呢個名，但期待兩名隊友有回歸嘅一日。
楊永杰同梁文廣今日舉行傳媒茶敍，開宗明義話而家得返「兩丁友」，決定簡單啲安排茶敍傾偈。原本屬於「A4」嘅張欣宇同林素蔚冇競逐連任，楊永杰話4個人仍然有聚頭，對方亦表明如果喺各自領域需要合作，會義無反顧幫手。楊永杰仲揚言期待兩個隊友回歸，形容「Never say never」（凡事無絕對）。
梁文廣將重返校園
兩位議員分享各自嘅新年目標，梁文廣今年9月會重返校園，喺教育大學修讀高級公共行政及領導碩士，除咗進修，佢相信同學仔包括大中華區政府官員，希望擴大人際網絡。梁文廣一向專注房屋議題，佢話喺宏福苑宏志閣居民群組，大約90%居民都希望納入政府收購業權方案，未來會主力協助居民。
至於楊永杰就尤其關注區內事務，話九龍城區有3個學車地點，屬於全港最多。而地點太接近令到居民感到滋擾，佢會跟進事項。另外，楊永杰關注街市空置率高企，希望推動活化街市，容許青年利用空置舖位創業。
ADVERTISEMENT
立即更新 /下載AM730手機APP 體驗升級功能
