立法會「C15+」聯盟擬向江旻憓招手
中文大學工程學院副院長黃錦輝涉嫌酒後駕駛，辭任立法會議員一職。原來立法會仲有「手尾」跟，佢所屬嘅「C15+」聯盟因為咁樣缺一隻腳，失去一個可獲分配嘅事務委員會席位。據了解聯盟正向「劍后」、旅遊界議員江旻憓招手，希望填補空缺。
立法會事務委員會席位「爭崩頭」，議員會合組名單以取得分配席位。根據內務守則，5位議員合組嘅名單可獲1席，9人名單會有2席，14人名單會有3席，如此類推。黃錦輝辭職後，令所屬嘅「C15+」名單跌到13人，正正損失一個可獲分配嘅事務委員會席位。
目前只係得何君堯同江旻憓冇加入任何名單，有傳媒引述消息話「C15+」聯盟正招攬江旻憓。《am730 》已向江旻憓辦事處查詢，正等候回覆。「C15+」召集人陳紹雄向傳媒表示，同唔同議員都有接觸，正積極考慮點樣填補位置。而立法會喺出年初先會重新分配事務委員會席位，仲有一段時間，期間好多嘢都可以發生。
何君堯形容自己是獨行俠
何君堯就向傳媒表示冇收到「C15+」邀請，但就話自己係獨行俠，唔好拖累人，無論邊個邀請都唔會加入名單。
ADVERTISEMENT
【👇請你食南記粉麵金銀蒜湯米線套餐👇】
