黃碧嬌請病假後現身茶樓　黨友：需長期食藥｜Ray Online

民建聯大埔區議員黃碧嬌捲入宏福苑大維修授權票風波，最近請病假缺席大埔區議會大廈管理工作小組會議。事隔幾日，黃碧嬌被目擊喺大埔一間酒樓食飯。

有網民噚日喺社交平台上載相片，睇到黃碧嬌同身旁男士，正喺一張酒樓大圓枱前打點餐具。枱面放有十幾套餐具，仲有幾枝啤酒。圖中見到地點係大埔墟「大日子酒家」，由民建聯前立法會議員張學明，聯同已故鄉議局前主席劉皇發等人合資開設。

黨友指黃碧嬌非傷風感冒

有報道喺8月19號揭發黃碧嬌團隊就宏福苑大維修收取131張授權票，當中包括已離世嘅業主。黃碧嬌翌日以身體不適為由缺席大埔區議會大廈管理工作小組會議。民建聯大埔區議員胡綽謙曾經喺會上查詢黃碧嬌缺席有冇醫生紙證明，佢今日向傳媒表示，冇睇過有關網上圖片，唔知黃碧嬌有冇出街食飯。但據佢了解黃碧嬌唔係傷風感冒，係需要長期食藥調理身體，而家已經精神返。