道路安全議會再辦口號創作比賽，希望進一步鞏固同提升公眾道路安全意識。(資料圖片)
「路上零意外，香港人人愛」係道路安全議會23年前，即係2003年「道路安全願景創作比賽」嘅獲選作品，口號至今家喻戶曉、深入民心。隨住香港交通網絡擴展、智慧出行推進、市民出行模式轉變等，議會認為道路安全宣傳策略亦需要與時俱進，即日起舉行「道路安全願景口號創作比賽」並接受報名、收集作品，希望進一步鞏固同提升公眾道路安全意識。
口號要琅琅上口兼具感染力
道路安全議會話，為咗貼近時代脈搏並凝聚社會共識，希望廣泛收集社會各界嘅創新意念。今次比賽以「願景口號」為核心，包括道路安全願景口號創作比賽，參賽者要撰寫簡短、琅琅上口且具感染力嘅道路安全願景口號，傳遞安全出行訊息。比賽同時有兩個延伸項目，分別係為議會吉祥物「留心蛋」設計全新形象或周邊造型，以及運用生成式人工智能(AI)技術，創作15至30秒提升市民道路安全意識嘅宣傳短片。
全港市民都可以參加今次比賽，今年12月31號截止報名同交作品。收齊作品之後，道路安全議會委員、相關政府部門代表同跨界別專業人士，會根據主題切合度、創意構思、技術表現同傳播力評選，出年2月會喺道路安全議會周年嘉年華展出得獎作品。
ADVERTISEMENT
