何敬康宣布「小何馬」順利誕生
立法會財務委員會今日通過額外撥款16億，以延長同為「新生嬰兒獎勵金」加碼。而新民黨議員何敬康咁啱就喺今日迎嚟新生命！
何敬康今日出文宣布「小何馬」順利誕生，望住眼前嘅小生命安靜咁瞓喺懷內，嗰種血脈相連嘅感動真係難以言喻。何敬康因為要入產房迎接新生命，今日缺席財會。不過，佢話絕對係用最實際嘅行動，全力支持政府鼓勵生育政策，親自為香港增加咗一個勞動力。
再研究添兒女
至於大家最近熱烈討論嘅「累進式生育」，何敬康叫各位親朋好友唔好心急。佢目前嘅當務之急，係做好眼前無限次嘅換尿片同餵奶工作。至於長遠發展，就等佢先搞掂呢幾個月嘅黑眼圈，再作可行性研究。
雖然何敬康缺席財會，但好多議員同事關心佢。自由黨邵家輝喺會上追問，何敬康係咪可以拎到兩萬蚊新生嬰兒獎勵金，引起全場大笑。政務司副司長卓永興回應話首先恭喜何敬康做爸爸，形容係一個好榜樣，更加承諾「兩萬蚊一定盡快畀佢！」
