中文大學聯合書院70周年院慶，運輸及物流局局長陳美寶在院慶典禮致辭
中文大學聯合書院迎嚟70周年院慶，作為校友嘅運輸及物流局局長陳美寶喺院慶典禮致辭，自爆當年有喺宿舍「屈蛇」瞓窗台，即係去其他同學嘅宿舍借宿，仲有聯同其他女同學喺宿舍廚房煮糖水，再同男同學分享！
靠表演練大膽
陳美寶回憶多姿多采嘅大學生活，原來佢當年喺聯合書院劇社公演做演員，話而家面對立法會質詢、傳媒訪問，以至接觸市民，都係靠當年上台表演練大個膽。陳美寶1989年喺中大工商管理學系（BBA）畢業，不過原來佢最初係讀化學系。但第一年就發現自己永遠係最遲完成實驗嗰個，做到件實驗室袍都花晒，一啲都唔得心應手。於是第二年決心轉讀工商管理。
到畢業，陳美寶當時收到兩份取錄通知，分別係滙豐銀行見習管理人員，同政府政務主任（AO）。經過大學四年生活認清志向，加上考慮到自己有舉辦活動嘅經驗，選擇投身公共服務。
