葉劉淑儀透露曾經邀請謝偉俊加入新民黨。(周令知攝)
立法會換屆選舉結束，新民黨嘅議席數目由現屆6席減到3席。冇競逐連任嘅新民黨主席葉劉淑儀，喺總結選舉記者會上面特別感謝3位現屆議員助選，包括江玉歡、謝偉俊同林素蔚，其中兩名女將最近都重返或新加入新民黨。
謝偉俊到曾參選地區助選
對於新民黨議席減少，葉太就被問到日後會唔會同更多獨立議員合作，甚至邀請埋謝偉俊加入新民黨。葉太話，其實十幾年前已經邀請過謝偉俊加入，「佢話佢屋企已經有位女士，佢唔想再跟另一位女士」，又多謝對方同配偶白韻琹喺灣仔區樂活、跑馬地等佢曾經參選過嘅地區，幫香港島東選區嘅郭浩景助選，期間亦都畀咗好多意見新民黨。
葉太唔評論將會同咩議員合作，但提到佢同冇競逐連任嘅容海恩、黎棟國會繼續參與黨務，又有信心喺未來更多新合作之下，長遠可以為新民黨爭取更多議席。另一邊廂，葉太恭喜實政圓桌田北辰成功交棒，又恭喜新界東南方國珊當選議員，既可以喺議會增加女性聲音，亦認為選民投票唔同「細黨」反映知道有制衡作用，「唔係大黨話晒事。」
ADVERTISEMENT
