譚爾培因事入醫院都不忘WFH。(資料圖片／林俊源攝)
政府最近推動夜經濟，市民玩完最緊要有車返屋企。民主派大埔區議員(西貢北)譚爾培最近因事入住中文大學醫院，而樓下嘅大學站總站正正就有佢選區範圍嘅小巴搭，估唔到佢話趁自己有能力落到床就WFH！佢講嘅WFH，其實講緊喺醫院工作(Work from Hospital)，即係夜晚喺窗邊望落樓統計小巴最尾4班車嘅開車時間，話要方便夜返嘅村民參考喎！
好似望住議會生涯嘅終點
譚爾培又話，望住選區小巴嘅另一邊終點站，就好似望住自己議會生涯嘅終點站咁。睇返資料，今屆區議會係佢第一次參選，當時以2,730票打敗要競逐連任嘅對手。不過，譚爾培上個月就話對新制度唔抱任何期望，所以完咗任期之後就會搵其他身份服務社會喇。
唔少街坊同網民都留言祝佢早日康復、唔好咁操勞，仲有人話佢不負眾望，喺病房都仲掛住選民。譚爾培早幾日提過，估唔到4年區議員生涯到最後都有新挑戰，「抱歉要放一陣假先。」
譚爾培話趁有能力落床，就幫街坊監察下小巴尾幾班車幾點開。(譚爾培FB)